Үһүс кылаас үөрэнээччитэ ийэтин кытта тюльпан үүннэрдэ

     Дьокуускай куорат 2-с нүөмэрдээх национальнай политиэхиньиичэскэй оскуола 3-с “Б” кылааһын үөрэнээччитэ Роберт-Арчылаан Еремеев ийэтин көмөтүнэн, ыйыытынан-кэрдиитинэн олорпут тюльпаннара бу күннэргэ сибэккилээн, көрбүт дьон хараҕын үөртэ. Тута сылааһы, сырдыгы аҕаларга дылы гынна.

Уоллаах ийэ тюльпан луковицаларын аахсыйаҕа түбэһэн, уопсайа, 13 суорду балаҕан ыйыгар интэриниэтинэн сакаастаан ылбыттар. Алтынньыга сакаастара кэлээтин кытта, тута бэлэмнээн, суурадаһынынан сотон баран буору булларан, тымнытарга (холодильник) уурбуттар.

Бастакы сибэккилэрин номнуо олунньу 3 күнүгэр тымнытартан таһаарбыттар. Кыралаан уу куппуттар. Били, остуоруйаҕа этиллэринии, киһи итэҕэйимиэн курдук сибэккилэрэ чааһынан улаатан, аҕыйах хонугунан үнүгэстэрэ тыллан барбыттар.

“Дьиҥэр, анал буорга олордуллуохтаах эбит эрээри, биһиги тэпилииссэ буоругар кыратык мас көөбүлүн булкуйан олордубуппут. Тыллар болдьохторун көрөн эрдэтээҥҥи, ортоһуор, хойукку диэн наардаабыппыт. Болдьоҕун сүрдээҕин билэр эбит, эрдэтээҥҥилэр бастакынан тылыннылар.

Анаан-минээн дьарыктанар дьон араас уоҕурдуулары куталлар. Биһиги биирдэ гумат уонна күл суурадаһынын куппуппут.

Барыларынааҕар үүннээйини бу уолбут Роберт-Арчылаан сэҥээрэр, кыратыттан сыстаҕас. Ол иһин сыыйа ити курдук чинчийэн, үөрэтэн көрүтэлиибит. Бу иннинэ эустома, петуния үүннэрэн көрбүппүт. Петунияны олордорго (черенкование) маастар-кылаас ыыппыта”, — диэн ыал ийэтэ Майя Гермогеновна кэпсиир. Бэйэтэ быйыл бөлөх тэрийэн, ийэлэри хаппырыыһынан биллэр эустома сибэккини олордууга тус уопутуттан үллэстибит. Эһиилгиттэн уолбун кытыннарыам диэн былааннаах.

Аны интэриэһинэйэ диэн сылаас дойду тюльпанын анал, сырдык, сылаас тэпилииссэҕэ буолбакка, гарааска үүннэрбиттэр. Иккис сууккатыттан үүнээйигэ аналлаах лаампаны холбообуттар. Сиигэ, температурата булгуччу тутуһуллуохтаах эбит. Температуратын халбаҥнатан сибэккилиир кэмин сыҕарытан, уһатан биэриэххэ сөп эбит диэн маҥнайгы холонууларыттан кэтээн көрбүт уопуттарын үллэстэллэр.

Майя Гермогеновна тюльпаннары социальнай ситимнэргэ таһаараатын кытта, тута бастакы атан эрэр сэттэ сибэкки үнүгэһин барытын атыыласпыттар. Тюльпан көрүүлээх эрээри, интэриэһинэй диэн этэр.

Манна даҕатан эттэххэ, Дьячковтар-Еремеевтар түөрт уоллаахтар. Оҕолоро кыыс-уол үлэтэ диэн толлон турбаттар, сайынын дойдуларыгар тиийэн оттууллар, сир астыыллар, булка-алка сылдьаллар. Кыһынын бу курдук араас дьарыгы булан күн иллэҥэ суохтар. Онон оҕону үлэнэн иитии үтүө холобурун көрдөрөллөр, таарыйа тыйыс тымныылаах Саха сирин олохтоохторун үөрдэллэр.