Үйэ-саас тухары үүнэ-силигилии туруохтун, «Кыайыыбыт маһа»

Кыайыы күнэ… Өрөгөйдөөх Кыайыы күнүн сахаттан бастакы Сэбиэскэй Сойуус Дьоруойа Фёдор Кузьмич Попов дьоно-сэргэтэ, Баатара орто оскуолатын, нэһилиэк түмэлин кэлэктиибэ кэрэ-бэлиэ кэһиилээх, кэккэ ситиһиилээх көрсөр.

Олортон биирдэстэрэ — «Кыайыы маһа» бырайыак олоҥхо Аал Луук маһыгар кубулуйан, күөх лабаа көмүс сэбирдэҕинэн сипсийэн, ол ааспыт тыйыс, алдьархайдаах кэми санатта,  билиҥҥи, кэлэр кэми кытта ситимнээн кэнчээрилээтэ, үүннэ.
«Кыайыы маһа» бырайыакка сахаттан бастакы Сэбиэскэй Сойуус Дьоруойа Ф.К.Попов аатынан Баатара орто оскуолатын үөрэнээччилэрэ, учууталлара, төрөппүттэрэ, нэһилиэк түмэлэ көхтөөхтүк кытыннылар. Бу бырайыак ахсынньы ый 9 күнүттэн саҕаланан, Кыайыы күнүгэр 2025 сылга түмүктэнэр.

«Кыайыы маһа» бырайыакпыт сүрүн сыала-соруга — фашистскай Германияны кыайыыга дойдубут элбэх омуктаах норуотун сөҕүмэр сомоҕолоһуутун, сүҥкэн дьулуурун уонна хорсун быһыытын үйэлэргэ кэрэһилээһин; кырыктаах кыргыһыы хонуутугар охтубут биһиги эһэлэрбит, аҕаларбыт, убайдарбыт, өстөөҕү самнаран, тыылга ахсаана суох дьоруойдуу быһыыны көрдөрбүт биир дойдулаахтарбыт көмүс ааттарын «Кыайыы маhа» лабаатыгар сэбирдэхтэринэн үйэтитии, үйэлэргэ хаалларыы.

Баатараттан уопсайа 171 буойун-уолаттарбыт Ийэ дойду көмүскэлигэр барбыттара. Кинилэр ааттара-суоллара бу сэбирдэхтэргэ суруллан, Qr-куодтанан тиhилиннилэр. Ону тэнэ «Кыайыы маhа» саайт оноhуллан, буойуннар олорон ааспыт олохторо сырдатылынна. Үйэ-саас тухары туруохтун, Кыайыы маһа!
Ким да умнуллубат, туох да умнуллубат. Олохтоохтор бырайыак ааптардарыгар, кыттыылаахтарыгар, Баатара орто оскуолатын дириэктэригэр Геннадий Макаровка, оскуола кэлэктиибигэр,  нэһилиэк түмэлин сэбиэдиссэйигэр Альбина Ходуловаҕа, кыраайы үөрэтээччилэргэ истиҥник махтаннылар, айымньылаах бырайыактар айылла, үксүү туралларыгар ба5ардылар.

Мария САННИКОВА (БАИШЕВА)