Хаартыска: ааптар тиксэриитэ
Суоттуга Кыһыл Кырдал ытык сиригэр «Үйэлэргэ умнуллубатын, көлүөнэлэргэ кэриэстэннин» диэн тэрээһин буолла.
Бу Улуу Кыайыы 80, Арассыыйаҕа Аҕа дойдуну, Саха сиригэр Ийэ дойдуну көмүскээччилэр сылларынан кыайыыны уһансыбыт ытык дьоммутугар сүгүрүйүү бэлиэтигэр долгутуулаах тэрээһин тэрилиннэ.
«Түһүлгэ» СК түһүлгэтигэр Аҕа дойду уоттаах сэриитин кыттыылаахтарын, тыыл, үлэ бэтэрээннэрин оҕолоро, сиэннэрэ, хос сиэннэрэ, аймах-билэ дьонноро түмүстүлэр. Кинилэр «Уруйдан, Улуу Кыайыы» диэн улуустааҕы бэстибээл чэрчитинэн туруоруллубут нэһилиэк улахан быыстапкатын улаханнык сэргээтилэр, сэҥээрдилэр. Бу күн ытык дьоммутугар ылбаҕай ырыалар, хомоҕой хоһооннор, истиҥ ахтыылар ананнылар.
Сэрии кэмин чахчыларын кэрэһэлиир Кыһыл Кырдал историятын, Суоттуттан Ийэ дойдуларын чиэстээхтик көмүскээбит хорсун-хоодуот буойуттар, тыылга бэйэлэрин харыстаммакка үлэлээбит, кыайыыны уһансыбыт бэтэрээннэр тустарынан болҕомтону тардар иһитиннэрии оҥоһулунна. Салгыы Аҕа дойду уоттаах сэриитин кыттыылааҕа, бэтэрээнэ Николай Власьевич Пермяков уола Дмитрий Николаевич Пермяков истиҥ ахтыыны оҥордо. Сиэннэрэ Татьяна, Иван, Вия Пермяковтар, хос сиэннэрэ, сэрии бэтэрээнэ Гаврил Сидорович Пермяков сиэнэ, Дьокуускайтан «Үһүс саас оскуолатын» салайааччыта Пелагея Юрьевна Прядезникова, үлэ, тыыл бэтэрээнэ Василий Николаевич Пермяков II кыыһа Анна Васильевна Пермякова Саргылана Осипова (Пермякова)-Айкүүс хоһоонноруттан литературнай монтаж, хос сиэн кыыс Оксана Пермякова дьүһүйүү хоһоону ааҕан иһитиннэрдилэр. Пермяковтар аймах тэрээһини өйөөн бэйэлэрин кылааттарын киллэрдилэр. Аҕа дойду сэриитин кыттыылааҕа, взвод командира, политрук Тимофей Тимофеевич Татаринов сиэнэ Тимофей Владимирович Татаринов хорсун быһыы туһунан ис сүрэҕиттэн кэпсээбитэ сэҥээриини ылла. «Түһүлгэ» СК сэбиэдиссэйэ Екатерина Николаевна Гоголева тэрээһин кыттыылаахтарыгар, ыалдьыттарга махтанан эҕэрдэ тыл эттэ.
Аҕа көлүөнэ дьоммут сырдык ааттара, өлбөт-сүппэт хорсун быһыылара үйэлэргэ умнуллубатын. Үүнэр көлүөнэ ыччакка өрүү үтүө өйдөбүл, холобур буоллун!
Ирина Осипова,
Суотту, Уус Алдан.
Бүгүн, ыам ыйын 9 күнүгэр, Дьокуускайга сылын аайы ыытыллар Кыайыы Оһуокайа үрдүк таһымнаахтык буолла. Быйыл…
Саха сиригэр Мэҥэ Хаҥаласка уонна Өлүөхүмэ оройуоннарыгар сүппүт эр дьону көрдүүллэр. Ааспыт сууккаҕа атын оройуоннарга…
Арассыыйа Дьоруойа Андрей Григорьев Москваҕа Кыайыы параадыгар кытынна. Кини ыҥырыылаах ыалдьыт быһыытынан олорорун "Бастакы" ханаалга…
Ыам ыйын 5 күнүгэр, Пушкин аатынан киин библитиэкэҕэ Үөһээ Бүлүү Балаҕаннааҕыттан төрүттээх, билигин Нам Түбэтигэр…
Таатта улууһун киинигэр Улуу Кыайыы 80 сыллаах үбүлүөйүн көрсө "Кыайыы көтөллөөх буойун учууталлар көмүс уруоктара"…
edersaas.ru саайт 2020 сыллаах архыыбыттан. Кыайыы 75 сылынан эһээм кэпсээниттэн тугу өйдөөн хаалбыппын суруйарга быһаарынным.…