ЫЙЫТ-ХОРУЙДУУБУТ: Баан каартатын туһунан биллэрии тахсара сөптөөх дуо?

– Социальнай ситимнэринэн маннык киһи баан каартатын буллубут диэн хаартыскалаах биллэрии бөҕө кэлээччи. Ол төһө сөптөөҕүй?

Объясняем. РФ саайтка бу ыйытыыга сыһыан­наах хоруй тахсыбыт:

– Куораттааҕы холбоһуктарынан, социальнай ситимнэринэн уонна дьиэтээҕи чааттарга чугас ыалларыҥ булуллубут мал-сал туһунан биллэриилэри таһаараллар. Сүтүктээх киһи түргэнник буларын туһугар кыһанан. Ол эрээри баан каартатын маннык таһаарар табыллыбат. Манан түөкүттэр туһаныахтарын сөп. Баан каартатын сирэйигэр суруллубут чахчыларын туһанан каартаны бас билээччини албынныахтарын уонна харчытын уоруох­тарын сөп.

Ону тэҥэ социальнай ситимнэргэ суруллубуту көрөн эйиэхэ каарта туһунан чахчыны билээри хаһаайын буолбакка, туора дьон албыннаан суруйуон сөп.