Ыйыт-хоруйдуубут: Байаҥкамаакка бэбиэскэнэн кэлбэтэххэ…

– Бэбиэскэ туппут киһи байаҥкамаакка кэлбэтэҕинэ ханнык төрүөттэри аахсалларый, билинэллэрий  (ыалдьыы, эчэйии, больничнай илиис, бииргэ төрөөбүттэрин ыалдьыылара эбэтэр “тиһэх суолларыгар атаарыы”)?

Байаҥкамаакка бэбиэскэнэн кэлбэтэххэ маннык төрүөттэри аахсаллар:

• Киһи ыалдьан эбэтэр эчэйэн үлэлиир кыаҕын сүтэрдэҕинэ.
• Аҕатын, ийэтин, эрин, ойоҕун, оҕотун, бииргэ төрөөбүт быраатын эбэтэр балтын, эһэтин, эбэтин эбэтэр ииппит киһитин ыарахан туруктара, биитэр чугас киһитин тиһэх суолугар атаарыыга кыттыбыт буоллаҕына.
• Киһи баҕатыттан тутулуга суох дьайыы түмүгүттэн үөскээбит моһолугар (холобура, айылҕа иэдээнэ).
• Ыҥырар хамыыһыйа аахсар атын төрүөттэрэ.

Бу төрүөттэр докумуонунан бигэргэннэхтэринэ эрэ аахсыллаллар.

Аахсыллар төрүөтүн болдьоҕо бүттэҕинэ ыҥырыллыбыт киһи хойутааһына, хаттаан ыҥырыыта  (бэбиэскэтэ) суох байаҥкамаакка кэлиэхтээх.