ЫЙЫТ-ХОРУЙДУУБУТ: Барыта сүөһүгэ эрэ туттуллуохтаах дуо?

– Сүөһү төбөтүгэр биэрэр 39000 солкуобайдарын барыта сүөһүгэ туттуллуохтаах дииллэр. Аһыыр-таҥнар көҥүллэммэт курдук. Аһаан-сиэн, кыһалҕабын толу­наары, сүөһү иитэн олордоҕум дии. Урут үүт харчытынан ­аһаан-таҥнан олорбуппут. Билигин барыта сүөһүгэ туттуллуохтаах  диэн бэлиитикэ дуо? Туохха анаан субсидия биэрэллэрин тустаах министиэристибэ быһааран суруйарыгар көрдөһөбүн.

Галина Саввина,

Таатта улууһун Туора Күөл олохтооҕо.

Ыйытыыга  СӨ Тыатын хаһаайыстыбатын уонна аһын-үөлүн бэлиитикэтин министиэристибэтин кыылы-сүөлү иитии салааларын, племенной үлэни, кэпэрээссийэни уонна дьоҕус киэптээх хаһаайыстыбалары сайыннарыыга департаменын салайааччытын э.т. Василий Бессонов хоруйдаата:

– Сүөһү төбөтүгэр ыанар ынахха бэриллэр 39000 сол­куобайдаах субсидия ынах көрүүтүгэр (на содержание коров) бэриллэр. Ол аата ынах көрүүтүгэр көрсөр ороскуоту толуйууга  көрүллэр: аhылыгар (комбикорм, от, сенаж), бэтэринээр оҥорор өҥөтүгэр, уот төлөбүрүгэр, уу тастарыытыгар.