Ньурба улууһун баһылыгын Телеграм-ханаалыттан.
Бу күннэргэ СӨ ситэриилээх былааһын ааспыт сыллааҕы отчуота нэһилиэнньэҕэ ыытылла турар. Онно үгүс ыйытыы бөрөнү бултааһыҥҥа киирдэ. Чуолаан, бөрө тириитин тутууга төһө үп көрүллэрин туоһуластылар.
Ыйытыыга СӨ экологияҕа, айылҕаны туһаныыга уонна ойуур хаһаайыстыбатыгар министиэристибэтин бултааһыҥҥа департаменын салайааччытын солбуйааччы Владимир Решетников маннык хоруйдаата:
— 2022 сыл кулун тутар 1 күнүттэн Арассыыйа Айылҕа харыстабылын министиэристибэтин 2011 с. тохсунньу 13 күнүнээҕи “Булт баайын ахсаанын хааччахтыыр туһунан быһаарыныы ылынар Бэрээдэги бигэргэтии” 1 №-дээх бирикээһигэр уларытыылар күүһүгэр киллэриллибиттэрэ. Манна олоҕуран бултанар кыыл ахсаанын хааччахтыыр туһунан быһаарыы тахсар, ол иһигэр бөрөҕө уонна хагдаҥ эһэҕэ. Киирбит уларыйыыларга олоҕуран, хоромньуну аҕалалларынан эбэтэр тыа хаһаайыстыбатын сүөһүлэригэр хоромньуну оҥороллорунан сибээстээн булт баайын хааччахтыыр туһунан уурааҕы ылынар усулуобуйа тохтотуллубута.
Онон сибээстээн, 2023 сыл тохсунньу 1 күнүттэн бөрө ахсаанын хааччахтыыр бултааһыҥҥа көҥүл үс эрэ күҥҥэ бэриллэр.Министиэристибэ сирдээҕи-уоттааҕы уонна биэдэмистибэннэй тэрилтэлэригэр биирдиилээн дьонтон уонна тыа хаһаайыстыбатын оҥорон таһаарааччыларыттан көрдөһүү (туруорсуу) киирдэҕинэ сөптөөх миэрэлэри ылыналларыгар ыйыы тиэрдиллибитэ.
Туһанылла сылдьар бэрээдэккэ сөп түбэһиннэрэн, адьырҕа кыыл дьон доруобуйатыгар хоромньуну оҥороро билиннэҕинэ, киирбит этиини үөрэтэн баран, суукка устата бу кыыл ахсаанын сүрүннүүргэ быһаарыы ылыныллар. Маныаха дьоҥҥо куттал үөскээбитинэн бу кыыл ахсаанын сүрүннээһин 3 халандаарынай күн иһигэр ыытыллыахтаах.
Маны сэргэ уларытыыны киллэрэр туһунан тустаах бырайыак тахсыаҕыттан биһиги эрэгийиэммит уратытын болҕомтоҕо ылалларын курдук этиилэри киллэрбиппит.
Билиҥҥи туругунан РФ Айылҕа харыстабылын министиэристибэтин “Арассыыйа айылҕа харыстабылын министиэристибэтин 2011 сыл тохсунньу 13 күнүнээҕи 1 №-дээх бирикээһигэр уларытыылары киллэрэр туһунан” бирикээһин бырайыага бэлэмнэннэ уонна сөбүлэһиннэриигэ сылдьар.
СӨ Бырабыыталыстыбатын 2016 сыл балаҕан ыйын 26 күнүнээҕи “Саха Өрөспүүбүлүкэтин сиригэр-уотугар бөрө, бөрө оҕотун тириилэрин тэрээһиннээхтик атыылаһыы ороскуотун үбүнэн-харчынан хааччыйыыга СӨ судаарыстыбаннай бүддьүөтүттэн субсидияны биэрии бэрээдэгин бигэргэтэр туһунан” 340 №-дээх уурааҕар олоҕуран субсидия бэриллэр.
2023 сыл тохсунньу 1 күнүттэн улахан бөрө тириитигэр субсидия ыстаапката 30 тыһыынча солкуобайга уонна бөрө оҕотун тириитигэр 10 тыһ. солкуобайга диэри үрдэтиллибитэ. 2023 сылга 15 мөл. солк. көрүллүбүтэ, ити үбүнэн 502 бөрө тириитэ тутуллубута.
2024 сылга бөрө тириитин атыылаһыыга 10 мөл солк. көрүлүннэ. Билигин субсидияны ылааччылары сүүмэрдээһин ыытыллар. Субсидияны ылааччылары быһааран баран, бөрө тириилэрин тутуохтара.
Алтынньы 17-31 күннэригэр Дьокуускай куоракка ыытылла турар “Чайковский Фест. Якутск” бэстибээл төрдүс биэчэрэ “Евгений Онегин”…
Ааспыт нэдиэлэҕэ Өлүөхүмэ улууһун Заречнай нэһилиэгэр оҕо аймах, дьон-сэргэ кэтэспит кэрэ-бэлиэ күнэ буолла. Ол курдук …
Ыраастаммыт, сууйуллубут куобаҕы өлүүлэргэ араартыыбыт, сибиинньэ эбэтэр сылгы этин кытта булкуйабыт. Эттэри чугуун иһиккэ кутабыт.…
Бырабыыталыстыба бэрэссэдээтэлин солбуйааччы Георгий Степанов Дьокуускайга В.П. Решетников аатынан кырдьаҕастар, инбэлииттэр олорор интэринээт-дьиэлэригэр уонна анал…
Дьокуускай куорат Борокуратуурата Арассыыйа ИДьМ “Дьокуускайдааҕы” СУ МУ РФ ХК 159 ыст. 4 ч. көбүппүт…
Кэнники кэмҥэ оҕолор түмсэн оонньообот буоллулар, үксүгэр төлөпүөнүнэн эрэ оонньууллар. Оттон элбэх буолан, сүүрэн-көтөн оонньооһун…