Ыйыт-хоруйдуубут: биир биридимиэти талан туттарыахтарын сөп

Ааҕааччыларбыт үөрэххэ сыһыаннаах ыйытыыларыгар хоруйдары бэлэмнээбиппитин таһаарабыт.

Ыйытыы: Эһиил 11-с кылааһы бүтэрээччилэр быйылгы курдук биир биридимиэти талан туттарыахтарын сөп дуо?

Хоруй: Үөрэҕи уонна билими кэтээн көрөр федеральнай сулууспа салайааччыта Анзор Музаев тэйиччиттэн көрүҥүнэн быйыл сэтинньи ортотугар төрөппүттэргэ анаан ыыппыт Бүтүн Арассыыйатааҕы мунньаҕар, кэлэр сылга биир кэлим эксээмэни (11-с кылаас кэнниттэн) туттарааччылар биир биридимиэти талан хат­таан туттарыахтарын сөп диэн иһитиннэрбитэ. Салайааччы быһаарбытынан, хаттаан туттарыы түмүгэр быйыл үөрэнээччи 73% баалын тупсарбыт, 9% баала оннунан хаалбыт. Онон туох даҕаны мөккүөрэ суох хаттаан туттараллара туһалаах диэн быһаарбыттар.

“Хаттаан туттарар туһунан сорудаҕы дойду бэрэсидьиэнэ биэрбитэ. Онон оҕолор кэлэр сылга эмиэ хаттаан туттарыахтара, маныаха анаан от ыйын 3 уонна 4 күннэрэ биир кэлим эксээмэн ыытыллар күннэрин быра­йыагар киирбитэ. Онтон икки түмүктэн биир бастыҥ көрдөрүүтүн талыы туһунан эттэххэ, манна биһиги көрүүбүт биир – суох. Бу улары­йыы, баҕар, эксээмэннэрин түмүгэ тупсан хаалыа диэн киллэриллибэтэҕэ. Бэйэтин кыаҕар эрэнэр, ол эрээри, олус долгуйбут эбэтэр туруга мөлтөөн, билиитин, кыаҕын олоччу туһамматах оҕолор бырааптара буолар”, – диэн сала­йааччы бы­­һаарбыта. Онон 2025 сылга 11-с кы­­лаастар биир биридимиэти талан хаттаан туттарыахтарын сөп. Ол гынан баран, иккис эксээмэн­нэрин түмүгэ эрэ учуоттаныаҕа, бастакы бааллара сотуллар.