ЫЙЫТ-ХОРУЙДУУБУТ: Бултка коптеры (дрону) туһаныахха сөп дуо?

Аныгы технология үйэтэ биир да сөкүүндэ тохтоон турбат. Олоҕу чэпчэтэр сыалтан мэлдьи туох эрэ саҥа айыллар, олоххо киирэр. Бултааһын эйгэтэ эмиэ хаалсыбат.

Ол курдук, саҥа, эбэтэр соччо саҥата да суох буолуон сөптөөх технология – дроннар уонна коптердар киирдилэр. Байыаннайдар уонна Сэбилэниилээх күүстээх структуралара бу тэрили туһалаах кыаҕын быданнааҕыта сыаналаабыттара, оттон хаартыскаҕа түһэрээччилэр уонна киинэ устааччылар киэҥ нэлэмэн көстүүлэри, кэрэ каадырдары түһэриигэ туһаналлар. Бэл, бултааһын уонна балыктааһын кэтээн көрөр уорганнара браконьердары тутарга көдьүүстээхтик туһаналлар.

Оттон булчуттарга хайдах буоларый?

Санатан эттэххэ, РФ Булт быраабылалара коптеры, дрону, тепловизоры туһаныыны боболлор: «62.9. …ханнык баҕарар сырдатар тэрили, тепловизоры, түүн көрөр прибордары бултуурга туһаныы бобуллар (бултааһыҥҥа хараҥа кэмҥэ көҥүллэнэр түгэниттэн ураты)…  62.12. …мэхэниичэскэй тырааныспар сириэстибэлэрин уонна ханнык баҕарар көтөр аппарааттары туһаныы бобуллар…».

Сокуону кэһии иһин туох эппиэтинэс көрүллэрий?

Билиҥҥи сокуонунан, РФ Административнай кодексатын 11.4 ыстатыйатыгар олоҕуран, коптеры регистрацията суох көтүтүүгэ административнай эппиэтинэс көрүллэр.

Ыстараап кээмэйэ:

• Сирэй дьоҥҥо – 5 тыһыынча солкуобай;
• Дуоһунастаах дьоҥҥо – 20-тэн 50 тыһыынчаҕа диэри солкуобай;
• Юридическай сирэйдэргэ – 300 тыһыынча солкуобайга диэри.