Ыйыт-хоруйдуубут: Цииркэҕэ ыытыллар дуо?

— Өрөспүүбүлүкэтээҕи оҕолору реабилитациялыыр киин сылын аайы цииркэҕэ инбэлииттэр дэкээдэлэригэр аналлаах наһаа үчүгэй тэрээһин ыытааччы. Араас маастар-кылаастар, туһалаах сүбэлэр, кэнсиэр бөҕө буолааччы, барыта буор босхо. Ол тэрээһиннэрин быйыл да ыытар инилэр. Мин сиэммин кытта көтүппэккэ сылдьабыт. Ол иһин быйыл хаһыс чыыһылаҕа буоларын билиэхпин баҕарабын.

Татьяна Попова, Дьокуускай куорат.

Бу ыйытыыга хоруйдууругар Өрөспүүбүлүкэтээҕи оҕолору реабилитациялыыр киин дириэктэрин эбээһинэһин толорооччу Анна Дмитриевна Пудова маннык хоруйдаата:

— Кырдьык, биһиги Кииммит тэриллиэҕиттэн бу үтүө санааттан тахсар тэрээһини сыллата ыытабыт (пандемия кэмиттэн ураты). Ааҕааччы суруйбутун курдук, биһиги Кииммит попечителэ Саха цииркэтин дириэктэрэ Сергей Васильевич Расторгуев үтүө санаатынан “Твори добро” диэн тэрээһиммит Цииркэ уораҕайыгар инбэлиит оҕолор кыттыылаах үрдүк таһымҥа ааһар. Быйыл биһиги оҕолорго анаан “Тымныы оҕонньор мастарыскыайа” диэн Саҥа дьылга аналлаах араас оҥоһуктарга маастар-кылаастары ыытыахпыт. Маны таһынан, сыл аайы буоларын курдук, Социальнай пуонда, социальнай харысхал, социальнай-мэдиссиинискэй бюро үлэһиттэрэ консультациялыахтара, онон ыйытыылаах буоллаххытына, манна тута хоруй ылыаххытын сөп. Тэрээһин иккис чааһыгар оҕолор уонна артыыстар кыттыылаах кэнсиэр буолуоҕа.

Биһиги тэрээһиммитигэр киириитэ босхо. Ким баҕалаах кэлэн маастар-кылаастарга кыттыан, кэнсиэр көрүөн сөп. Онон оҕолоргутун, сиэннэргитин илдьэ кэлэн сэргэхсийэн бараргытыгар ыҥырабыт.

Буолар күнэ — ахсынньы 10 күнэ, буолар сирэ — Саха цииркэта, саҕаланыыта — 14.00.