ЫЙЫТ-ХОРУЙДУУБУТ: Эһэттэн хайдах сэрэниэххэ?

— Сураҕын иһиттэххэ, Алдан диэки сугун үүммүт үһү. Ымсыырабын аҕай. Ити диэки сугуннуу барсыахпын баҕарабын, биллэриилэри көрөбүн. Ол эрээри аны адьырҕаҕа түбэһиэхпит диэн хайдах эрэ куттанабын. Хайдах сэрэниэххэ сөбүй?

Мииринэйтэн Егор Егорович Сыромятников‑Дьөгүөр Һэрэмээт маннык сүбэлээтэ:

— Тыаҕа сылдьар кэмҥэ дьиикэй кыылы көрдөххө, саамай сөптөөҕө — чугаһаамаҥ. Айаннаан иһэр буоллахха, тохтуур, массыына аанын, түннүгүн арыйар сатаммат.

Ханна көрбүккүтүн охотоведтарга, экология тэрилтэлэригэр этиэххитин сөп. Арыт, айылҕа кыыла дьон олорор сиригэр тахсан кэлэр. Ол — ыксаллаах быһыы-майгы көрүҥэ, быһылаан буолуон сөбүн сибикитэ.

Ойуурга кыылы көрөн сонурҕааһын, хаартыскаҕа түһэрэр баҕа санаа сороҕор үүйэ-хаайа тутааччы. Ол эрээри, оннук үлүһүйүү доруобуйаҕа, олоххо кутталы үөскэтэрин умнумаҥ. Тэскилии охсубут ордук.

Тыаҕа сылдьар кэмҥэ испиискэ, туос илдьэ сылдьар ордук. Холобур, тыһы эһэ оҕотуттан көҥүөн, саба түһээри бэлэмнэниэн сөп. Оннук түгэҥҥэ уоту уматар ордук: кыыл уоттан куттанар, чугаһаабат. Тыаҕа сылдьар кэмҥитигэр бэйэҕитин, чугас дьоҥҥутун харыстааҥ, сэрэхтээх буолуҥ!