ЫЙЫТ-ХОРУЙДУУБУТ: Унтууну атыылаһарга туохха болҕомто ууруохха сөбүй?

Унтуу атыылаһарга туохха болҕомто ууруохха сөбүй?

— Аан бастаан, тыһын көрүөххэ наада, кыыл таба тыһа дуу, дьиэ табатын тыһа дуу. Дьиэ табатын тыһа бөҕө буолар.

Иккиһинэн, уллаһыга хаатыҥка дуу, боолдьох дуу?  Боолдьох буоллаҕына, синтетическэй дуу, натуральнай дуу. Ону араарарга синтетическэй боолдьох барыта тэбис-тэҥ буолар. Ол гынан баран, тымныы уонна халтархай буолааччы. Оттон натуральнай боолдьох онон-манан мас сыыһа эҥин кыбыллыбыт, тэҥэ суох маассаттан оҥоһуллубута көстөр. Маннык унтуу сылаас уонна халтархайа суох.

Аны туран кырааскаламмыт тыс биир да маҥан кырымах түүтэ суох буолар.

Сорох унтуу микропора диэн ааттаах түгэҕэр сыһыарыллар эрэһиинэлээх буолар. Ол, биллэн турар, халтархай бөҕө. Биэтэһин иһин (унтуу иһин кэтэх өттө) атылаас матырыйаал гынар ордук, онтуҥ устарга-кэтэргэ үчүгэй.