ЫЙЫТ-ХОРУЙДУУБУТ: Гектар ылыахпын баҕарабын

— “Дальневосточнай гектар” ылыахпын баҕарабын. Каартаҕа эҥин ылар сиргин бэйэҥ талыахтааххын дииллэр. Ону ыарырҕатар курдукпун. Ким көмөлөһүөй?

Дьокуускай к. олохтооҕо.

Ыйытыыга СӨ Баайга-дуолга уонна сиргэ сыһыаннаһыыга министиэристибэтин Сир бэлиитикэтигэр департаменын кылаабынай исписэлииһин э. т. Ираида Чемпина маннык хоруйдаата:

— Сайабылыанньаны биэриигэ ыарырҕатар дьоҥҥо анаан Электроннай өҥө сектордарыгар сүбэ-ама оҥоһуллар. Холобура, өрөспүүбүлүкэ Национальнай бибилэтиэкэтигэр уонна оройуоннардааҕы киин бибилэтиэкэлэргэ. Бибилэтиэкэлэр үлэһиттэрэ анал үөрэтиини аастылар уонна Саха сирин олохтоохторугар сайабылыанньаны биэриигэ, ылыахтаах учаастактарын талыыга уонна докумуоннары толорууга көмөлөһөллөр. Бу өҥөнү дьон олус биһирээтэ. Ыам ыйыгар 70 тахса киһи бу өҥөнөн, көмөнөн туһанна.