Ыйыт-хоруйдуубут: Глюкометры хайдах босхо ылыахха сөбүй?

Эһиги саахардаах диабеттаах буоллаххытына, глюкометры уонна тест-полоскалары ОМС полиһынан босхо ылыаххытын сөп.

Ол туһугар бэйэҕит поликлиникаҕытыгар тиийэн, көрдөрүнэн терапевт эбэтэр эндокринолог бырааскытыгар суруттарыаххытын наада. Баар буоллаҕына, диагноһы бигэргэтэр анаалыстаргыт түмүктэрин илдьэ тиийиҥ. Бу туһунан Объясняем.рф саайт суруйар.

Быраас наадалаах ырысыабы суруйан биэриэҕэ, ол ырысыабынан эмтиэкэттэн глюкометры уонна тест-полоскалары босхо ылыаххытын сөп. Пациеннар  эми-тому «Уһун үйэлээх уонна көхтөөх олох» национальнай бырайыакка киирэр «Саахардаах диабеты утары охсуһуу» федеральнай бырайыак чэрчитинэн ылаллар.

Бу бырайыак көмөтүнэн эрэгийиэннэргэ аныгылыы эндокринологическай кииннэри тэрийэллэр уонна балыыһалары, ол иһигэр тыа сиринээҕи балыыһалары саҥа тэрилинэн хааччыйаллар.