Ыйыт — хоруйдуубут. Хайыыбыный?

 Баайга-дуолга нолуогум төлөбүрүгэр нолуок тэрилтэтиттэн иһитиннэрии туппатах буоллахпына, хайыыбын?

А. Стручкова.

Арассыыйа ФНС СӨ управлениетын судаарыстыбаннай өҥөлөрү оҥорууга 1 №-дээх отделын кылаабынай судаарыстыбаннай иниспиэктэрэ Елена Слепцова маннык эппиэти ыытта:

— Эбийиэги бас билээччини нолуок төлөбүрүттэн олоччу босхолуур чэпчэтиинэн туһанар буоллаххына, нолуоккун төлүүр туһунан иһитиннэрии ыытыллыбат. Сороҕор уопсай суумата 100 солкуобайтан кыра буолар түгэнэ баар буолааччы. Маннык түгэҥҥэ иһитиннэрии ыытыллыбат, ол эрээри син биир ыытыллыаҕа, тоҕо диэтэххэ, нолуок сулууспатын нолуогу ирдиир болдьоҕо үс сыл. Бу сыл иһинэн төлүөхтээх суумаҥ биир мөһөөктөн кыра да буоллаҕына, биллэрэр суруктары (уведомление) ыытар. Саарбахтыыр түгэҥҥитигэр нолуок уорганыттан ыйытыҥ.

Балартан атыттарга Арассыыйа ФНС саайтыгар тус кэбиниэккитигэр киирэн көрүөххүтүн сөп. Нолуогу төлүүр болдьоххутун аһарымаҥ. Нолуоккутун ахсынньы 1 күнүгэр диэри төлүөхтээххит.