Ыйыт-хоруйдуубут: хапытаалынай өрөмүөн төлөбүрүн тоҕо эрдэттэн төлүүбүтүй?

Ааҕааччыларбыт “Саха сирэ” хаһыакка араас ис хоһоонноох ыйытыылары биэрэллэр. Сорохтор эрэдээксийэҕэ кэлэн да ыйыталаһаллар. Дьон кыһалҕата да араас. Онно кыах баарынан хоруйдуурга кыһанабыт.

– Хапытаалынай өрөмүөн төлөбүрүн син төлүү сатыыбыт. Ол эрээри биһиги дьиэбит саҥатык. Ол хаһан өрөмүөн оҥоһуллара ыраах буоллаҕа. Тоҕо төлүүрбүтүн олох сатаан өйдөөбөппүн.

Е.Павлова

Ыйытыыга “СӨ Элбэх кыбартыыралаах дьиэлэри хапытаалынай өрөмүөннээһиҥҥэ пуондата” тэрилтэ дьиэни бас билээччилэри кытта үлэҕэ отделын начаалынньыга Саида Петрова маннык хоруйдаата:

— Холобура, дьиэҕитигэр суһаллык хапытаалынай өрөмүөн наадата тирээтэҕинэ, дьиэни бас билээччилэр бэрт түргэнник үбү-харчыны булаллара уустук. Онон судаарыстыба уонна бас билээччилэр хонтуруолларынан ый аайы өрөмүөн үбүн мунньар табыгастаах.

Хапытаалынай өрөмүөн – бу ыарахан сыаналаах үлэ. Маны дьиэни бас билээччилэр биирдэ төлөөн кэбиһэр кыахтара суох эбэтэр биир эбэтэр икки сыл устата үбү-харчыны түргэнник мунньубаттар. Ханнык баҕарар дьиэ кэмэ кэллэҕинэ дьиэни тутан турар конструкциялара, инженернэй ситимнэрэ эргэрэр. Онон өрөмүөнү ыытарга үбү мунньуу уһун кэми эрэйэр.

Хапытаалынай өрөмүөнү ыытыы олорор дьиэҕит ырыынакка сыанатын улаатыннарарын эмиэ умнумаҥ.