ЫЙЫТ-ХОРУЙДУУБУТ: Харбиҥҥа көтүүнү толуйаллар дуо?

— Кытайга сынньанар барыстаах, онно сынньаннаххына 73 бырыһыанын толуйаллар диэн кэпсииллэрин иһиттибит. Бу кырдьык дуо?

Дьокуускайга баар “АЙВА” туристическай ааҕыныстыба менеджерэ Виктория Ивановаттан туоһуластыбыт.

— Өскөтүн айанныыр киһи үлэтигэр эбэтэр биэнсийэлээххэ бырайыаһа төлөнөр буоллаҕына, Дьокуускай — Дьокуускай маршрутунан айанын ороскуотун үлэни биэрээччи эбэтэр Биэнсийэ пуондата бу киһи айаныгар ороскуотун 71,53% төннөрөр. Бу туһунан ити дойдуга тиийиини ааҕыы ортодромическэй табылыыссатыгар (Значения ортодромических расстояний от международных аэропортов Российской Федерации до зарубежных аэропортов) барыта ыйыллар. Онон хас биирдии буҕалтыарыйа бу табылыыссаттан тустаах иһитиннэриини ылыахтаах. ГАВС-тан ыспыраапка аҕалыыны ирдиэ суохтаахтар. Уонна, саамай сүрүнэ, хас биирдии киһи авиабилиэти бэйэтин каартатынан “Якутия” АК саайтыгар киирэн бэйэтэ атыылаһар кыахтаах. Маныаха хомуур (сбор) эҥин диэни төлөөбөт. Уонна буҕалтыарыйатыгар бэйэтин каартатынан ылбытын чиэгинэн отчуоттуур. Быһата, саайтынан атыыластахха, хомуур тутуллубат. Онон “Якутия” саайтынан атыылаһар табыгастаах дии саныыбын. Тоҕо диэтэххэ, Харбиҥҥа “Якутия” эрэ хампаанньа Саха сириттэн көтөр. Киирэн толороргутугар ааккытын, араспаанньаҕытын, төрөөбүт күҥҥүт-дьылгыт, пааспаргыт нүөмэрин, пааспаргыт туолар болдьоҕун туһунан сыыһата суох суруйуу ирдэнэр. Сыыһаны буллахтарына, көтөргүтүгэр ыстараап төлөтүөхтэрин сөп. Бары билэргит курдук, Кытайга киирэргэ виза хайаан да ирдэнэр, онно икки киһиттэн элбэх буолуохтааххын (виза по прилету), итиннэ визовай өйөбүл оҥоробут.