ЫЙЫТ-ХОРУЙДУУБУТ: Кирэдьиит страховкатыттан аккаастаныахха сөп дуо?

Страховка бааны ночооттон, оттон кирэдьиит ылааччыны – болдьоҕун аһарыыттан көмүскүүр. Холобур, кирэдьиит ылааччы ыараханнык ыалдьан эбэтэр үлэтин сүтэрэн кирэдьиитин төлүүр кыаҕа суох буоллаҕына, диэн объясняем.рф иһитиннэрэр.

Страховой түбэлтэ туоллаҕына, баан иннигэр иэһи страховой хампаанньа төлүөҕэ.

Страховка ханнык көрүҥнээх буоларый?

Булгуччулаах – бу солуогу страховкалааһын. Холобур, ипотеканы төлүүргэ. Маннык полистан аккаастанар табыллыбат: кирэдьиит ылааччы страховканы оҥотторорго уонна кэмигэр уһаттарарга эбээһинэстээх. Холобур, өскөтүн кыбартыыра, дьиэ эбэтэр сир учаастага баһаартан, ууттан эмсэҕэлээн, онно олорор кыаллыбат буоллаҕына, киһи ипотекатын салгыы төлөөбөт, оттон баан  харчытын страховой хампаанньаттан ылар.

Көҥүл – ханнык баҕарар кирэдьиит көрүҥэр бэйэ баҕатынан оҥоттороллор. Ол гынан баран, онтон аккаастаннахха баан маннык гыныан сөп:

• бырыһыаннаах ыстаапканы үрдэтэр;
• кирэдьиит сууматын эбэтэр болдьоҕун аччатар;
• кирэдьиит биэрэртэн аккаастыыр.

Көҥүл страховкаттан хайдах аккаастаныахха сөбүй?

Кирэдьиит ылааччыга аккаастанарыгар 30 хонук бэриллэр. Ол инниттэн:  сайабылыанньа суруйуҥ;  страховой хампаанньаҕа тиэрдиҥ. Ону таһынан, кирэдьиити болдьоҕун иннинэ саппыт уонна страховой түбэлтэ тахсыбатах буоллаҕына, полис үлэлээбит кэмигэр төлөммүт харчыны төннөрөр кыахтааххыт: харчыны төннөрөр туһунан сайабылыанньа суруйуҥ;  маннык докумуоннары сыһыарыҥ: пааспар, страховой полиһы атыыласпыт чегы, страховой полиһы, кирэдьиит дуогабарын, кирэдьиити толору саппыт туһунан ыспыраапканы.

Кирэдьиит усулуобуйатыгар дьайар страховкаларга, харчыны төннөрүү быраабылата «Итэҕэл кирэдьиитин туһунан» уонна «Ипотека туһунан» сокуоннарынан салайтарар. Өскөтүн эһиэхэ страховка харчытын төннөрөртөн аккаастаатахтарына  Киин Бааҥҥа үҥсүү суруйуҥ.