Ыйыт-хоруйдуубут: күннээҕи олох-дьаһах тула

Ааҕааччыларбыт “Саха сирэ” хаһыакка араас ис хоһоонноох ыйытыылары биэрэллэр. Сорохтор эрэдээксийэҕэ кэлэн да ыйыталаһаллар. Дьон кыһалҕата да араас. Онно кыах баарынан хоруйдуурга кыһанабыт.

Хас тыс нааданый?

– Быйыл бултуу барарбар этэрбэс тиктэрээри гынабын. Төһө тыс киирэрий? Сүбэлээҥ эрэ.

П.Слепцов.

Ыйытыыга Өлөөн Харыйалааҕыттан иис­тэнэр мастарыскыай сэбиэдиссэйэ Роза  Ивановна Томская хоруйдуур:

– Булчут этэрбэһигэр 12 тыс сөп буолар. Ол эрээри, ол тыс төһө улаханыттан тутулук­таах. Бастаан тыскын сүлэн ылаҕын, ыраастаан хатараҕын, ол кэннэ кыһыахтыыгын, эмэҕинэн илитэн өҥүттэн көрөн 2-4 чаас сытыараҕын. Онтон сонуйан баран илиигинэн имитэҕин. Кылгастык сүбэлээтэххэ итинник.