ЫЙЫТ-ХОРУЙДУУБУТ: Кырдьаҕас киһини көрөллөр дуо?

– Биир кыһалҕалаах боппуруоһунан тиийдибит. Кырдьаҕас ийэбитин быстах кэмҥэ түүҥҥү өттүгэр көрөр киһиэхэ – сиделкаҕа наадыйабыт. Биир эмэ маннык өҥөнү толорор тэрилтэ баара буолаарай? Биллэриилэринэн түбэһиэх көрдүөхпүтүн баҕарбаппыт.

Ыйытыыга Дьокуускайга үлэлиир “Гувернер” ааҕыныстыба салайааччыта Анна Артамонова  хоруйдаата:

– Билиҥҥи кэмҥэ маннык кыһалҕа­лаах дьон элбээтэ. Биһиги кинилэргэ хаһан баҕарар көмөлөһөргө бэлэммит. Үлэһиттэри түмэр баазабар аҕам саастаах киһини көрүөххэ сөптөөх, эппиэтинэстээх үлэһиттэр бааллар. Кырдьык, дьон үксэ ханна эмэ ыраа­та бараары гыннаҕына,  араас  дьиэ уонна үлэ да кыһалҕаларынан ийэлэрин-аҕаларын көрдөрөөччүлэр. Кырдьаҕас киһи элбэх болҕомтону, көрүүнү эрэйэр. Онно кыалларынан көмөлөһөргө бэлэммит.