ЫЙЫТ-ХОРУЙДУУБУТ: Нолуокка иэстээх буоллахпына, сынньана барарым табыллар дуо?

— Уоппускабар, баҕар, билиэтим табылыннаҕына, Кытайга сынньана бараары гынабын. Нолуокка иэстээх буоллаххына, кыһалҕаны көрсүөххүн сөп дииллэр. Ол кырдьык дуо?

Ыйытыыга Арассыыйа ФНС Саха Өрөспүүбүлүкэтигэр управлениетын 1 разрядтаах исписэлииһэ Пелагея Гуляева маннык хоруйдаата:

— Уоппуска кэмигэр кыраныысса таһыгар тахсыыга бобуу эбэтэр иэһи күһэйэн тутан ылыы миэрэтигэр түбэспэт туһугар эрдэттэн нолуокка иэһэ суох буоларга кыһаныахтааххын. Онон күүтүүлээх уоппускаҥ иннинэ иэскин төлүөхтээххин.

Нолуокка иэскин Арассыыйа ФНС www.nalog.gov.ru саайтыгар “Личный кабинет налогоплательщика для физических лиц” сервис көмөтүнэн, AppStore уонна GooglePlay хачайдыырга сөптөөх “Налоги ФЛ” босхо мобильнай сыһыарыынан, Судаарыстыбаннай өҥө порталыгар эбэтэр нолуок сулууспатыгар кэлэн бэрэбиэркэлээ.

Арассыыйа ФНС саайтыгар киирэн “Уплата налогов и пошлин” сервис көмөтүнэн, “Личный кабинет налогоплательщика для физических лиц” эбэтэр Судаарыстыбаннай өҥө порталынан тэйиччиттэн төлүөххэ сөп.

Санатан эттэххэ, тус кэбиниэккитигэр эбэтэр “Налоги ФЛ” мобильнай версиятыгар нолуок уорганыгар ылбыт логиҥҥынан уонна парольгунан эрэ буолбакка, Судаарыстыбаннай өҥө порталынан бигэргэммит учетнай запиһынан (ЕСИА) киириллэр.

Ону тэҥэ бүддьүөккэ иэскитин бааннар салааларыгар, мобильнай сыһыарыыларынан уонна буоста салааларыгар эмиэ төлүөххэ сөп.

Нолуокка иэскит суут бириистэптэрин сулууспаларыгар ирдэбилгэ баарын Арассыыйа ФССП саайтыгар “Банк данных исполнительных производств” билиэххэ сөп.