Ыйыт-хоруйдуубут. Олох-дьаһах тула

Күндү ааҕааччыларбыт!  “Ыйыт-хоруйдуубут” рубрикаҕа Саха сирин олохтоохторуттан киирэр араас ис хоһоонноох ыйытыыларга кыахпыт тиийэринэн ирдэһэн, хоруйдуубут. Дьон араас төлөбүрдэргэ мунаарара үгүс. Ол эрээри, олоххо-дьаһахха сыһыаннаах ыйытыылары чопчулаһаллар.  

Учаастагым кыраныыссатын хайдах чуолкайдыыбын?

–  Сирим кыраныыссатын чуолкайдаары гынабын. Хайдах оҥотторобунуй?

В.Иванов.

Анна Дорофеева, “Дорофеева А.А.” ИП кадас­тровай инженерэ:

– Учаастак кыраныыссата суох буоллаҕына, ону оҥортороллор. Ол эбэтэр, учаастак кыраныыссата публичнай кадастровай каартаҕа көстүбэт буоллаҕына. Ону оҥотторорго кадастровай инженергэ межевой былаан сакаастыахха наада. Маныаха учаастак бастакы, ол эбэтэр урукку докумуоннара наадалар.

Кадастровай инженер тиийэн дьиҥнээх учаастак кыраныыссатын мээрэйдиир уонна бу киһи ыалларын кытта сөбүлэһиннэрэр.

Онтон сакаастаабыт киһи межевой былааны (дискэлээх) ылан баран, Элбэх өҥөнү оҥорор киин нөҥүө Росреестргэ туттарыахтаах. Ону туттардаҕына, учаастагын кыраныыссата публичнай ка­­дастровай каартаҕа киириэхтээх.

Бэчээккэ бэлэмнээтэ Женни Стрюкова