ЫЙЫТ-ХОРУЙДУУБУТ: Осеменаторы хаһан ыҥырыахха?

— Саҥа ынахтанан эрэр ыалбыт. Ынахпыт төрөөтө. Хаһан осеменаторы ыҥырабыт?

Васильевтар.

“Сахаагроплем” тэрилтэ зоотехнига Татьяна Протопопова маннык сүбэлээтэ:

— Ынах төрөөбүтүн кэннэ төрөөбүт күнүттэн 18–22 хонугар диэри кэтээн көрөҕүт. Ити кэмҥэ ынах орбоҥуттан хойуу убаҕас сүүрэр. Онтон улам-улам өстүөкүлэ курдук ырааһырар. Улахан ынах балтараа да суукка буолуон сөп. Ынах мөхсөр-тахсар, үүтэ да түһүөн сөп, тэпсэҥниир, кутуруга сымныыр, хараҕа дьэргэйэр. Онтон ити быһыыта тохтоон, чуумпуран хаалар. Ону кэтээн көрөн техник-осеменатор, сүөһү хаһаайына болокунуокка бэлиэтэниэхтээхтэр. Онтон ынах эмиэ итинник быһыыланарын 18–22 күн кэтииллэр. Тоҕо диэтэххэ, ынах маатката оннугар түһэ илик буолар. “Дьахтар килиэккэтэ” үөскүүр. Ону ити кэми эбэтэр үһүс циклигэр 60‑с хонугар таба тутуохтааххын. Ол эрээри иккис циклигэр ууланара табыгастаах.