Ыйыт-хоруйдуубут: тарыып үрдүүр дуо?

Ааҕааччыларбытыттан ыйытыылар киирэллэр. Дьокуускай олохтооҕор маннык хоруй бэрилиннэ.  

— Сыана күн-түүн ыарыыр, ОДьКХ сыаната эмиэ. ОДьКХ тарыыптарын 2025 сыл от ыйын 1 күнүттэн 13 быр. үрдүө дииллэр.

Мержевич Галина Николаевна,

Дьокуускай.

Ыйытыыга СӨ Сыана бэлиитикэтин судаарыстыбаннай кэмитиэтиттэн маннык хоруйу ыыттылар:

— Хомунаалынай өҥө тарыыптара сылга биирдэ от ыйын 1 күнүттэн ыарыыллар. РФ Бырабыыталыстыбата нэһилиэнньэҕэ хомунаалынай өҥө тарыыптарын улаатыытын тутар. Тарыыптар сыллата улаатыылара федеральнай таһымҥа бэриллэр параметрдары куоһарбат. Олохтоммут кээмэйинэн тарыыбы улаатыннарбатахха, бу оттугу атыылаһыыга, өрөмүөн үлэтин ыытыыга эргитэр үп тиийбэт буолуутугар, саахал тахсыытыгар тиэрдиэн сөп.

Өрөспүүбүлүкэ бары гражданнарыгар чэпчэтиилээх, ол эбэтэр намыһах тарыыптар хомунаалынай өҥөҕө олохтоммуттара. Дьокуускай к. олохтоохторо хомунаалынай өҥө дьиҥнээх сыанатыттан 72,1% төлүүллэр, ордубут 27,9% ресурсанан хааччыйар тэрилтэлэргэ өрөспүүбүлүкэ бүддьүөтэ уйунар. Онон өрөспүүбүлүкэҕэ ОДьКХ өҥөлөрүн иһин төлөбүрдэр Уһук Илиҥҥэ саамай намыһахтар.

Дьиэ кэргэн чопчу төлөбүрүн үрдээһинэ олорор дьиэлэригэр хомунаалынай өҥө көрүҥнэрин нобуоруттан, ол дьиэ-уот пуондатын хааччыллыытын туругуттан тутулуктаах. Өскөтүн дьиэ-уот хомунаалынай өҥөтүн төлөбүрэ дьиэ кэргэн дохуотуттан 15% ылар буоллаҕына, оччоҕуна субсидия ылар бырааптаналлар. Ол эрээри манна 5 уонна онтон элбэх оҕолоох ыалларга, туспа олорор үлэлээбэт биэнсийэлээхтэргэ чэпчэтиилээх шкала көрүллэр. Субсидия туһунан сиһилии Субсидия ааҕыныстыбатыттан ыйытыҥ (төл: 8–800–222–50–70).