Ыйыт-хоруйдуубут: төһө кутталлааҕый?

Ааҕааччыларбытыттан ыйытыылар киирэ тураллар. Соторутааҕыта быыһыгар маҥаннаах таба этин видеоҕа устубуттар этэ. Ону көрбүт дьонтон маннык ыйытыы киирдэ.

— Киһи наар социальнай ситимҥэ туох тарҕаммытынан олорор кэмэ кэллэ. Соторутааҕыта быыһыгар маҥаннаах таба этин атыыласпыттарын туһунан видео тарҕаммыта. Бу туох кутталлаах маҥанай? Бука, итинник эти сиир табыллыбата буолуо ээ.

Ыйы­тыы­га СӨ Бэ­тэ­ри­нээ­ри­йэ уп­рав­ление­тын са­ла­йаач­чы­тын сол­бу­йаач­чы э.т. Анас­та­сия Ни­ки­ти­на ман­нык эп­пиэт­тээ­тэ:
— Кырдьык, маннык финноһунан сүһүрбүт эти сиир кутталлаах. Ситэ буспатах эти, тууһамматах балык этин сиэн киһи сүһүрүөн сөп. Каапсуланан хараҕалана сылдьар финноз личииҥкэтэ киһи куртаҕар киирэн уһуктан, үүнэн, сайдыбытынан киирэн барар. Личииҥкэ киһи оһоҕоһугар хатанан сайдар, улаатар. Киһи организмыгар паразит 3 ый иһигэр ситэр-хотор уонна паразит 10 миэтэрэҕэ тиийэ уонна онтон да улаатыан сөп.
Финноһунан ыалдьа сылдьаргын өр билимиэххин сөп, ыарыы сибикитэ оннук сытыытык биллибэт үгэстээх. Ол эрээри, клиническэй түбэлтэҕэ, киһи сүрэҕэ көбөр, хотуолуур, аппетита суох буолар, тахсан киирэрэ буккуллар, ыйааһына лаппа түһэр, төбөтө ыалдьар, майгыта да мөлтүүр. Паразит киһи мэйиитин, хараҕын, тыынар уорганнарын, тириитин уонна личииҥкэ олохсуйбут уорганнарын үлэтин мөлтөтөр, күүскэ дьайар. Финноз личииҥкэтэ олус үрдүк температураҕа эрэ өлөр. Онон үксүн ыарыы эти ситэ буһарбакка сиир түбэлтэҕэ үөскүүр. Личииҥкэлэр тымныы кыраадыска эмиэ өлөллөр эрээри, ол бэрт эрэлэ суох, тымныы дьайыыта өр кэмҥэ буолуохтаах. Эти уһуннук, 70-80 үрдүк кыраадыска буһарыы, ыарыы тарҕаныытын кутталын аҕыйатар. Ол гынан баран, дьиэ усулуобуйатыгар сүһүрбүт эти тута быраҕар, аска туттубат ордук. Уһуннук буһарыы даҕаны личииҥкэни суох оҥорору мэктиэлээбэт. Паразиты бүтүннүү өлөрөргө, эти үрдүк кыраадыска 2-3 чаас устата буһарыллар, ону анал автоклавтарга эрэ ситиһиллэр. Доруобуйаҕын харыстыыр туһугар, паразиттаах эти сиэбэт ордук. Төттөрүтүн ол содула бэйэҕитигэр, дьиэ кэргэҥҥитигэр, чугас дьоҥҥут доруобуйатыгар олус улахан охсуулаах буолуон сөп.

Дьоҥҥо сэрэтэр миэрэлэр:
– дьиэ уонна кыыл этин бэтэринээринэй-санитарнай бэрэбиэркэ ыытыллар маҕаһыыннарыгар уонна ырыынактартан эрэ атыылаһыллыахтаах;
– атыыга-эргиэҥҥэ анамматах сирдэртэн эти атыылаһар табыллыбат;
– эт атыылааччылартан бэтэринээринэй өттүнэн арыаллыыр докумуоннары ирдиир тоҕостоох;
– тус гигиена быраабылаларын тутуһуу булгуччу ирдэниллэр.

Бэчээккэ бэлэмнээтэ Женни Стрюкова