ЫЙЫТ-ХОРУЙДУУБУТ: Туһаныллыбатах уоппуска хонуга «умайар» дуо?

РФ Үлэҕэ кодексатыгар сөп түбэһиннэрэн, төлөбүрдээх уоппуска үлэһиккэ сыл аайы бэриллиэхтээх. Бу быраап үлэһиккэ 6 ый устата үлэлээбитин кэннэ үөскүүр. Бу туһунан «Гарант» систиэмэ суруйар.

Уоппусканы чаастарынан араарар көҥүллэнэр, ол эрээри биир чааһа икки нэдиэлэттэн итэҕэһэ суох буолуохтаах. Үлэһити кытта сөбүлэһэн, уоппуска аныгы сылга көһөрүллүөн сөп.

Өскөтүн үлэ инспекцията эбэтэр борокуратуура үлэһиккэ икки сылтан ордук кэмҥэ уоппуска бэриллибэтэҕин буллаҕына, тэрилтэни эбэтэр дуоһунастаах сирэйи административнай эппиэтинэскэ тардар төрүөт буолуон сөп. Бу ыстатыйанан дуоһунастаах сирэй 1000-тан 5000 солк. диэри, оттон юридическай сирэй – 30 000-тан 50 000 солк. диэри кээмэйдээх ыстарааптанар.

Маны таһынан үлэһит быйылгы уоппускатыгар ааспыт сылларга мунньуллубут туһаныллыбатах күннэрин холбуур бырааптаах. Ол эрээри, үлэ биэрээччигэ уоппуска туһаныллыбатах күнэ элбэҕиттэн ыстараап түһэриллэр төрүөтэ үөскүүр, ону таһынан үлэһит уурайар түгэнигэр туһаныллыбатах уоппускатын иһин бөдөҥ кэмпэнсээссийэ төлүүр төрүөттэнэр.