ЫЙЫТ-ХОРУЙДУУБУТ: Тыа хаһаайыстыбатыгар уһуннук үлэлээбиттэргэ биэнсийэ эбиллэр дуо?

— Тыа хаһаайыстыбатыгар уһуннук үлэлээбиттэр биэнсийэлэригэр эбилик кэлэр дииллэр. Кырдьык дуо?
И. Федоров.
Ыйытыыга Арассыыйа Социальнай пуондатын (СФР) Саха сиринээҕи салаатын пресс-сулууспата маннык матырыйаалы ыытта:
— Тыа хаһаайыстыбатыгар 30 сылтан итэҕэһэ суох кэмҥэ үлэлээбит уонна биэнсийэ ананар кэмигэр тыа сиригэр олорбут буоллахтарына, уһун кэмнээх үлэлэрин ыстааһын иһин биэнсийэҕэ эбилик ылаллар.
Кырдьаҕаһынан эбэтэр инбэлииттээҕинэн страховой биэнсийэҕэ олохтоммут төлөбүртэн үрдэтии кээмэйэ 25% тэҥнэһэр. 2025 сылга — 2226,92 солк., оттон үһүс группалаах инбэлиитинэн биэнсийэ ылааччыларга — 1113,46 солк.
Тыа сирин ыстааһын иһин эбиллиитин учуоттаан фиксированнай төлөбүр кээмэйин билэр туһугар судаарыстыбаннай өҥө порталыгар тус кэбиниэккэ киириэххэ сөп. Бу эбилик куоракка көстөххө эбэтэр тыа сирин поселениета куорат сиригэр кубулуйдаҕына даҕаны, оннунан хаалар. Билигин 2900 киһи туһанар.
Үрдэтиллибит кээмэйдээх биэнсийэни анатыыга кини тыа хаһаайыстыбатын эйгэтигэр үлэлээбит кэмигэр оҕону көрөн олорбут кэмэ, аармыйаҕа сулууспата, уоппуската уонна больничнайга олоруута учуоттанар.
Сообщить об опечатке
Текст, который будет отправлен нашим редакторам: