ЫЙЫТ-ХОРУЙДУУБУТ: Убаһаны хайдах талыахха?

— Халлааммыт тымныйан, бу күннэргэ хайдах эрэ күһүммүт чугаһаабыт курдук. Быйыл күһүн хантан эмэ убаһа ылан ииппит киһи дии саныыбыт. Эт эҥин сыаната да ыараата. Онон убаһаны таларга кылгас сүбэтэ биэриҥ эрэ.

Трифоновтар.

Дьылдьыт уонна сылгы иитиитигэр дьоһун кылаатын киллэрсибит Андрей Варламов маннык сүбэлээбитин таһаарабыт:

— Дьэ, күһүн буоллаҕына, убаһа талыахпыт. Онно маннык кылгастык сүбэлиибин:

1. Убаһа ороһута, кырата улахан оруолу оонньообот. Түүтүн арыйан көрдөххө, ньуолах түүлээх (куобах түү) буолуохтаах. Аһары уһун ньуолаҕа суох түүлээх сылгы тымныыны тулуйбат. Кулгааҕа кылгас чөрөгөр, таныыта сөбүгэр киэҥ, хараҕа толору буоллаҕына, үчүгэй сылгы буолар. Биэ үүттээх буоллаҕына, убаһа ситэр, ситэри төлөһүйэр.

2. Туйаҕа онньунан үктэммэтэх, көнө буолуохтаах, тыс сэбэрэлээх (эбэтэр атаҕын кэннэ түүлээх), атахтара модьу, түөһэ кэтит буоллаҕына, сыыстарбаккын.

3. Убаһа ийэтин биэни, атыырын хантан сыдьааннааҕын билэн таллаххына, үтүө сылгы буолар.