ЫЙЫТ-ХОРУЙДУУБУТ: Уоппуска болдьоҕун көһөрүү

«Биһиги тэрилтэбитигэр кэлэр сыллааҕы уоппуска кыраапыга эрдэ оҥоһуллар. Ол эрээри, сороҕор уоппуска болдьоҕо көһөрүллэр, холобур, үлэһит уоппускатын кэмигэр ыалдьан хаалар. Үлэни биэрээччи ханнык түгэҥҥэ атын болдьоххо көһөрөр эбээһинэстээҕий?»

Идэлээх сойуустар федерацияларын Үлэ быраабыгар иниспиэксийэтин салайааччы, СӨ үтүөлээх юриһа Наталья Барковская ыйытыыларга хоруйдуур.

— РФ Үлэ кодексын 123‑с ыстатыйатыгар олоҕуран, сыллааҕы төлөнөр уоппуска эрдэ бигэргэммит кыраапык быһыытынан бэриллэр. Бу кыраапык үлэһиккэ да, үлэни биэрээччигэ да булгуччулаах. Ол эрээри, олоххо араас буолар, онон уоппусканы атын күҥҥэ көһөрөр түгэн үөскүүр. Үлэ кодексын 124‑с ыстатыйатынан, үлэни биэрээччи үлэһит баҕатын учуоттаан туран, маннык түгэннэргэ уоппусканы атын болдьоххо көһөрүөн сөп:

— үлэһит быстах кэмҥэ кыайан үлэлиир кыаҕа суох буоллаҕына (ыарыйдаҕына);

— сыллааҕы төлөнөр уоппускатын кэмигэр үлэһит судаарыстыбаннай эбээһинэстэрин толоро сылдьар, дьиҥэ, сокуон быһыытынан, үлэттэн босхолонуохтаах буоллаҕына;

— атын түгэннэргэ. Онно киирсэр: тэҥинэн икки үлэлээх киһи уоппуската сүрүн үлэтин уоппускатын кытта биир кэмҥэ түбэһэр буоллаҕына; дьахтар уоппускатын күннэрин хат буолуу, төрөөһүн уоппускатын кытта холбуон баҕарар буоллаҕына; үлэһит уоппускатын кэргэнин хат буолууга, төрөөһүҥҥэ уоппускатын кытта тэҥҥэ ылыан баҕарар буоллаҕына.

Маны тэҥэ, үлэһит сыллааҕы уоппускатын төлөбүрэ кэмигэр төлөммөтөх буоллаҕына эбэтэр кини уоппуската саҕаланарын икки нэдиэлэ иннинэ эрэ билбит буоллаҕына, үлэһит сайабылыанньатынан, үлэни биэрээччи сыллааҕы төлөнөр уоппусканы атын болдьоххо көһөрөр эбээһинэстээх.

Уоппуска бэриллэр сыла бүппүтэ 12 ый иһинэн туһаныллыахтаах. РФ Үлэ кодексын 124‑с ыстатыйатын 4‑с чааһынан, икки сыл устата сыллааҕы төлөнөр уоппусканы биэрбэт буолуу бобуллар. Ону тэҥэ, 18 сааһын туола илик үлэһиккэ уонна буортулаах усулуобуйалаах үлэҕэ сылдьар дьоҥҥо уоппусканы биэрбэт буолуу эмиэ бобуллар.