Ыйыт-хоруйдуубут: Үлэ киниискэтин биэрбэт бырааптаахтар дуо?

Тэрилтэ  дьоно үлэни биэрээччи уонна бэйэтин быраабын ситэри билбэтэ баар буолар. Ол да иһин, тустаах идэлээх дьоҥҥо элбэх ыйытыыны биэрэр, сүбэ-ама көрдүүр.

“Үлэһит  бэйэтэ баҕаран  үлэтиттэн уурайбыт. Ол гынан баран, үлэһит обходной лииһи толорботох диэннэр,  киниэхэ үлэтин киниискэтин биэрбэттэр.  Итинник дьайыы төһө сөптөөҕүй?”

Саха Өрөспүүбүлүкэтин Идэлээх сойууһун федерациятын үлэҕэ быраап иниспиэксийэтин салайааччы, СӨ үтүөлээх юриһа Наталья Ивановна Барковская хоруйдуур:

-Үлэни биэрээччи маннык дьайыыта олоҕо суох.

РФ Үлэҕэ кодексатын 84.1 ыстатыйата үлэ дуогабарын тохтоторго уопсай бэрээдэги олохтуур.

Ханнык баҕарар түгэҥҥэ үлэ дуогабара тохтотуллубут күнүнэн үлэһит үлэлээбит бүтэһик күнэ ааҕыллар.

Үлэһит тохтообут күнүгэр үлэни биэрээччи эбээһинэһэ:

-Үлэ киниискэтин эбэтэр үлэлээбитин туһунан сибидиэнньэни биэриэхтээх;

— Үлэһиккэ ааҕыллар бары төлөбүрү оҥоруохтаах. Ол гынан баран, үлэһит уурайар күнүгэр үлэлээбэтэх буоллаҕына, кини  төлөбүрү  биэрэр туһунан ирдэбили түһэрбитин аныгыскы күнүгэр төлүөхтээх;

-Үлэһит сайабылыанньатынан,  үлэни кытары сибээстээх докумуоннар куопуйаларын биэриэхтээх.

-РФ Үлэҕэ Кодексатын быһыытынан, обходной лииһи толорботоҕор сигэммэккэ, үлэһиккэ үлэ киниискэтин, үлэлээбитин туһунан сибидиэнньэни  хойутаппака биэриэхтээх.  Киниискэни биэриини тардар, уһатар түгэнигэр үлэһит ылбатах хамнаһын толуйар эбээһинэстээх. Үлэни биэрээччи бу ирдэбили толорортон аккаастаннаҕына, кини урукку үлэһитэ судаарыстыбаннай иниспиэксийэҕэ үҥсэр эбэтэр суукка ирдэбил түһэрэр бырааптаах.