Ыйыт-хоруйдуубут: Үлэттэн уураттахтарына, орто хамнас төһө өр төлөнөрүй?

Дьон-сэргэ үлэ, үлэҕэ сыһыан боппуруостарыгар, бэйэ быраабын туһаныыга уо.д.а. мунаарар ыйытыыта элбэх.

“Дуоһунаһы  сарбыйыынан сибээстээн, миигин  үлэттэн уураппыттара уонна уурайбыт күммүттэн  бастакы ыйга туһааннаах төлөбүрү биэрбиттэрэ. Мин биэнсийэлээхпин, онон дьарыктаах буолуу сулууспатыгар бара да сылдьыбатаҕым. Тоҕо  диэтэххэ, үлэлээбэт киһиэхэ бэриллэр төлөбүрү биэнсийэлээх киһиэхэ  син биир анаабаттар. Үлэҕэ киирэргэ эмиэ былааннаммаппын. Өскөтүн мин дьарыктаах буолуу уорганыттан ыспыраапкам суох буоллаҕына, үлэни биэрээччи үлэттэн уһуллубутум иккис уонна үһүс ыйдарыгар хамнаспын төлүөхтээх дуо?” – диэн ааҕааччы ыйытар.

Саха Өрөспүүбүлүкэтин Идэлээх сойууһун федерациятын үлэҕэ быраап иниспиэксийэтин салайааччы, СӨ үтүөлээх юриһа Наталья Ивановна Барковская хоруйдуур:

-РФ Үлэҕэ кодексатын 318 ыстатыйатынан, Уһук Хотугу сиргэ уонна онуоха тэҥнээх сирдэргэ баар тэрилтэ үлэһит ахсаанын уонна штаты аҕыйатыынан сибээстээн үлэһитин уураттаҕына, ыйдааҕы орто хамнаһын кээмэйинэн төлөбүрү биэрэр.

Манна сыһыаран эттэххэ, үлэһит ахсаанын эбэтэр штаты аҕыйатыынан сибээстээн,  үлэһити ууратар туһунан үлэни биэрээччи үлэттэн устуон икки ый инниттэн илии баттатан туран,  тус бэйэтин сэрэтиэхтээх (180 ыстатыйа).

РФ Үлэҕэ кодексатын 318 ыстатыйатын 2-с чааһынан, үлэһит ахсаанын уонна штаты аҕыйатыынан сибээстээн уурайбыт үлэһит биир ый иһинэн үлэ булбатаҕына, үлэни биэрээччи киниэхэ уурайбытын иккис ыйыгар орто хамнаһын эбэтэр сорох чааһын төлүүр эбээһинэстээх. Онтон үлэни икки ый иһигэр булбатаҕына, үлэни биэрээччи киниэхэ уурайбытын үһүс ыйыгар орто хамнаһын эбэтэр сорох чааһын төлүүр эбээһинэстээх.

Үлэттэн ууратыллыбыт киһи уурайбыта иккис уонна үһүс ыйа ааспытын кэнниттэн 15 үлэ күнүн аһарбакка эрэ,  үлэни биэрээччигэ хамнас орто кээмэйин төлүүллэрин туһунан сурук түһэрэр бырааптаах.

Үлэһит уурайбытын кэннэ иккис уонна үһүс ыйдарга төлөбүрү ыларыгар кини үлэни биэрээччигэ үлэтин киниискэтин уонна пааспарын көрдөрүөхтээх. Үлэ киниискэтин оннугар үлэтин туһунан сибидиэнньэлэрин көрдөрүөн эмиэ сөп.