Ыксалга-тиэтэлгэ тугу астыыбыт?

Үлэлии-хамсыы, дьиэ-уот бүппэт түбүктэригэр үтүрүйтэрэ сылдьар хаһаайкаҕа, ыксалга-тиэтэлгэ туһанарыгар анаан түргэнник бэлэмнэнэр астар ырысыаптарыттан биэрэбит.

Спагеттилаах сымыыт
4 сымыыт, 50 г. спагетти, 1 помидор, 4 остолобуой ньуоска ынах арыыта, 2 ост. ньуоска үүт, 50 грамм сыр, сөбүгэр туус.

Спагеттины оргуйа турар туустаах ууга буһарабыт, 1 см. гына быһаттаан баран, бытархайдык кырбаммыт, ыһаарыламмыт помидору уонна теркаламмыт сыыры кытта булкуйабыт. Бэлэм спагеттига үүккэ буккуллубут, ыһаарыламмыт сымыыппытын саба кутабыт.

Сырдаах иэдьэгэй
200 грамм иэдьэгэй, 100 г. сүөгэй, 100 г.сыр, сөбүгэр туус.

Сыры улахан теркаҕа мэһийэбит, иэдьэгэйи сиитэ нөҥүө ыытабыт. Иккиэннэрин холбуу булкуйабыт, туустуубут, сүөгэй эбэн биэрэбит.

Сүөгэйдээх, моркуоптаах иэдьэгэй

200 грамм иэдьэгэй, 2 остолобуой ньуоска сүөгэй, 1 моркуоп, 2 чаайынай ньуоска саахар, сөбүгэр туус.

Иэдьэгэйи ныһыйабыт. Моркуобу сууйан, ыраастаан баран теркалыыбыт. Иэдьэгэйи илдьиритиллибит моркуобу кытта булкуйабыт, саахар, туус , сүөгэй эбэбит уонна үчүгэйдик булкуйабыт.

Сырдаах ириис хааһы
1 ыстакаан ириис куруппа, 50 грамм сыр, 1 остолобуой ньуоска ынах арыыта, 2 ыстакаан уу, сөбүгэр туус.

Оргуйа турар туустаах ууга ирииспитин буһарабыт. Уута ириистээҕэр икки төгүл элбэх буолуохтаах, оччоҕо илдьирийбэккэ буһар. Ирииспитин ууллубут ынах арыытын кытта
булкуйабыт, онно бытархай гына илдьиритиллибит сыры кутабыт.

Сымыыттан сокууска
4 сымыыт, 1 моркуоп, 30 грамм ынах арыыта, 50 гр. майонез, укуруоп, сөбүгэр туус.

Сымыыттары бүтэйдии буһарабыт, аҥардаан баран, араҕастарын ылабыт. Араҕастарын ынах арыытын, укуруобу, майонеһы кытта булкуйабыт. Итиннэ ыраастаммыт, теркаламмыт, кыратык буспут моркуобу холбоон булкуйабыт. Сымыыппыт маҥаныгар ити бэлэмнээбит маассабытын кутан уурабыт.

Ветчиналаах уонна сырдаах бутерброд
Биир батон үрүҥ килиэп аҥара, 200 грамм ветчина, 200 грамм сыр, 1 остолобуой ньуоска кетчуп, укуруоп эбэтэр петрушка.

Килиэби 1 см. халыҥнаах гына быһан баран, чараастык кетчубунан биһэбит. Ветчинаны уонна сыры кыра гына кырбастыыбыт.
Килиэп үрдүгэр ветчинаны, онтон сыры уурабыт. Уонна духуопкаҕа буһаран ылабыт. Укуруобунан эбэтэр петрушканан киэргэтэн баран остуолга итиилии биэрэбит.

Крабовай палочка уонна помидор
200 грамм крабовай палочкалар, 3 помидор, лимон аҥарын суога, 1 баайыы укуруоп, 100 грамм майонез, хара илдьиритиллибит биэрэс, сөбүнэн көрөн туус.

Крабовай палочкалары кыра гына кырбыыбыт, помидордары сууйан баран кыра аҥаардарга арааран бысталыыбыт. Крабовай палочкалары помидордары кытта булкуйабыт, лимон суогун эбэбит, туустуубут, биэрэс эбэбит, майонезтыыбыт, укуруобунан киэргэтэбит.