Ыксаллаах быһыыга-майгыга эмсэҕэлээбиттэргэ төлөбүр туһунан

Айсен Николаев ыксаллаах быһыыга-майгыга эмсэҕэлээбиттэргэ төлөбүрдэри индексациялыырга соруйда. 

Бүгүн, ыам ыйын 23  күнүгэр, ыксаллаах быһыыны-майгыны сэрэтэр уонна туоратар хамыыһыйа мунньаҕар, Ил Дархан Айсен Николаев эрэгийиэн бырабыыталыстыбатыгар халаан уутуттан эмсэҕэлээбиттэргэ материальнай уонна үп-харчы өттүнэн көмө кээмэйин улаатыннарарга соруйда.

«Кылгас кэм иһигэр көрө охсорго уонна быһаарыы ыларга көрдөһөбүн. Халаан уутуттан эмсэҕэлээбиттэргэ төлөбүр саҥа ааҕыынан барыахтаах», — диэн министирдэр кэбиниэттэрин чилиэннэригэр Айсен Николаев туһаайан эттэ.

СӨ экологияҕа, айылҕаны туһаныыга министир Евгений Перфильев иһитиннэрбитинэн, бу ый түмүгүнэн эмсэҕэлээбит гражданнар ахсааннара номнуо 3384 киһи буолбут.

Дьон-сэргэ судаарыстыбаннай өҥө порталыгар сайабылыанньаларын салгыы биэрэллэр. Халаан уутуттан эмсэҕэлээбит дьонтон номнуо 1925 сайабылыанньа киирбит.

Айсен Николаев ОДьКХ уонна энэргиэтикэ, тырааныспар уонна суол хаһаайыстыбатын, тыа хаһаайыстыбатын, бырамыысыланнас эбийиэктэригэр аварийнай-чөлүгэр түһэрэр үлэлэр хаамыыларын туһунан иһитиннэриини иһиттэ.

Маны таһынан, туспа Нам уонна Өлүөхүмэ оройуоннарын нэһилиэнньэлээх пууннарыгар субуотунньуктар тэриллиилэрин, оҕолор сынньалаҥнарын, нэһилиэнньэҕэ мэдиссиинэ көмөтүн оҥоруу, эминэн-томунан хааччыйыы туһунан дакылааттаатылар.

Санатан эттэххэ, ыам ыйын 20 күнүттэн өрөспүүбүлүкэ сиригэр-уотугар ыксаллаах быһыы-майгы эрэсиимэ биллэриллибитэ. Бырабыыталыстыба нэһилиэнньэлээх пууннары уонна экэниэмикэ эбийиэктэрин чөлүгэр түһэриигэ, нэһилиэнньэ олоҕун-дьаһаҕын хааччыйыыга уонна эмсэҕэлээбиттэргэ социальнай уонна материальнай көмөнү оҥорууга миэрэлэри ыларыгар сорудахтаммыта.

Сиһилии https://www.sakha.gov.ru/news/front/view/id/3400371  манна ааҕыаххытын сөп.

СӨ Ил Дарханын уонна Бырабыыталыстыбатын пресс-сулууспата

Хаартыскаҕа Андрей Сорокин түһэриитэ, СИА