Үлэ дьонун өрөгөйө – бэйэни харыстаммат түбүктээх үлэ түмүгэ

Ил Дархан Айсен Николаев “Үлэ киһитэ” бириэмийэтин АПК эйгэтиттэн 6 киһи тутта. Кинилэри Тыа хаһаайыстыбатын министиэристибэтигэр ыҥыран, министиэристибэ салайааччылара, аппараат үлэһиттэрэ уонна биир идэлээхтэрэ истиҥник эҕэрдэлээтилэр.

Үлэ сылыгар бастакынан бириэмийэ ылбыт кимнээхтэрий?

Ариада Маркова лауреаттартан саамай аҕа саастаахтара, 51 сыл үлэ ыстаастаах. Сопхуоска сүөһүнү иитиигэ үлэлээбит баай уопутун туһанан, 20 сыллааҕыта Таатта Харбалааҕар “Булуус” бааһынай хаһаайыстыбаны тэриммитэ. Ариада Анатольевна үс сүөһүттэн саҕалаан бүгүн 344 сүөһүгэ, ол иһигэр 120 ыанньык ынахха тириэрдибитэ – элбэх сыранан, бэриниилээх үлэнэн ситиһиллибитэ чахчы. Киниэхэ үс оҕото үһүөн тэҥҥэ үлэлэһэн, көмөлөһөллөр. Кыыһа Анна былырыын осеменатор куурсугар үөрэнэн, билиҥҥи туругунан, бэлиэр, 90 ньирэйдэммиттэр.

А.А.Маркова 2012 с. дьиэ кэргэн ферматын сайыннарыы гранын кыайан, 100 ыанньыкка толору мэхэньисээссийэлээх хотон туттарбыта. Онтон кэлин “Булуус” бэйэтин кыаҕынан эмиэ 100 миэстэлээх хотону туттубута. Улахан хаһаайыстыба иллэрээ сыл эмиэ грант үбүн ылан, 150 төбөҕө суоттаммыт хотону тутан киллэрдэ. Таатта бөдөҥ уонна “эдэр” (хойут тэриллибит) бааһынай хаһаайыстыбатын сүрүн кыһалҕата – оттуур сирэ кырыымчыга. Сыл аайы ыаллыы нэһилиэктэри таһынан Амма, Хаҥалас улуустарыттан эбии от атыылаһан, элбэх сүөһүтүн кыстатар. Быйылгы кыстыкка от атыытыгар 2 мөл. солкуобайы ороскуоттаабыт. Өссө даҕаны 70 туонна от итэҕэс…
Арассыыйа үтүөлээх фермерэ, СӨ тыатын хаһаайыстыбатын үтүөлээх үлэһитэ министиэристибэҕэ көрсүһүүгэ: “Оҕо эрдэхпиттэн фермаҕа улааппыт, каникулу билбэккэ, сүөһүгэ үлэлээбит буоламмын үөрэнэн хаалбыппын. Ким эрэ бу орто дойдуга оҕолору үөрэтээри, ким эрэ дьону эмтээри айыллан кэлэр. Биһиги дьону аһатар аналлаах буоллахпыт. Урут сопхуоска салайааччы этэринэн сылдьыбыт буоллахпына, билигин бэйэм сопхуос дириэктэрин курдук сананабын, тугу баҕарбыппын оҥоробун. Онуоха Ил Дархаммыт, бырабыыталыстыбабыт уонна министиэристибэбит тирэх буолалларын иһин ис сүрэхпиттэн махтанабын. Судаарыстыба көмөтө суох улахан эбийиэктэргэ киһи санаммат даҕаны. Биһиги ситиһиибит, кыайыыбыт эһиги көмөҕүтүнэн уһаарыллар”, – диэтэ уонна базата Амма өрүс уҥуор турар буолан, элбэх ороскуоту көрсөрүнэн, астыыр-үөллүүр сыаҕы үрдүттэн тэринэр уонна сүөһүгэ иҥэмтэлээх аһылыгы бэлэмниир туһуттан сир үлэтин кэҥэтэр былааннааҕын эттэ.

Тыа хаһаайыстыбатын министиэристибэтэ