Үлэ дьонун күннээҕи түбүктэн сынньатан ыллылар

Мэҥэ Хаҥалас улууһун култууратын үлэһиттэрэ  урукку агитбиригээдэ үлэтин сөргүтэн, от ыйын 11 күнүттэн үлэ дьонугар улахан сэргэхсийиини таһаардылар, кинилэр  махталларын ыллылар.

Саха тыллаах кутун туппут, айылҕаттан айдарыылаах ырыаһыт, мелодист Валерий Ноев төрөөбүтэ 85 сылыгар аналлаах «Мин дууһам ыллыыр» диэн айаны тэрийэн, нэһилиэктэргэ, сайылыктарга сырыттылар.

Уостан түспэт ырыалардаах Валерий Ноев ырыаларын тыыннаах доҕуһуолунан толордулар. Ону сэргэ кини  олоҕун, айар үлэтин сырдатар көһө сылдьар быыстапканы, маастар-кылаастары тэрийдилэр.

Нэһилиэктэргэ, сайылыктарга, ходуһаҕа ыалдьыттаабыт, дьоннорун-сэргэлэрин үөрдүбүт түгэннэри үйэтитэн, Валерий Ноев «Мин дууһам ыллыыр» ырыатыгар хомуур-килиип оҥорон үйэтиттилэр.