Үлэ кэннэ, киэһэ тахсан, доруобуйаҕын көрдөрүн

Дьокуускай куоракка балаҕан ыйын 15 күнүгэр диэри “Доруобуйа” национальнай бырайыак чэрчитинэн, “Эмчит, үтүө киэһэнэн!” диэн аан бастакытын ураты аахсыйа ыытылла турар. Аахсыйаны СӨ Доруобуйатын харыстабылын министиэристибэтэ тэрийэр.

Бу аахсыйа сыала-соруга диэн – куруук солото суох үлэһит дьон дьиэлэриттэн, үлэлэриттэн ыраата барбакка, киэһэ 5 чаастан 9 чааска диэри кэлэн, түргэнник доруобуйаларын туругун бэрэбиэркэлэнэллэрин ситиһии, нэһилиэнньэ киэҥ араҥата диспансеризация ааһарыгар көҕүлээһин буолар. Чахчы, табыгастаах ньыма.

Аахсыйаны куорат мэдиссиинэҕэ тэрилтэлэрэ араас сирдэргэ, болуоссаттарга тэрийэллэр. Биирдэ үлэм кэнниттэн дьаарбайа сылдьан, Дьокуускай куорат мэдиссиинэҕэ кииниттэн 203-с түөлбэҕэ Ларионов уулуссатыгар кэлэн туралларын көрөн, соһуччу соҕус доруобуйабын көрдөрүнэргэ сананным.

“Национальные проекты” диэн суруктаах икки анал массыына кэлэн тураллар. Бастаан терапевт бырааска көрдөрүнэҕин, анкета толороҕун. Онтон массыыналарга киирэн, флюорографияҕа, маммографияҕа, эхокардиограммаҕа түһэҕин, дьахталлар гинекологка көрдөрүнэллэр. Сиэстэрэ хаан уопсай анаалыһын ылар. Уочаратыттан көрөн, чаас аҥаарынан, 1 чааһынан бүтэҕин. Массыына иһэ дьоҕус эрэээри, ыраас, сылаас, суунар сир, анал тэрил барыта баар.

Бу түмүктэрин 3-4 күнүнэн балыыһаҕа, ыйбыт кэбиниэттэригэр баран ылаҕын. Солото суох киһи барытын биир сиргэ көрдөрөрө үчүгэй эбит. Ол эрээри, анаалыстар өссө элбэхтэрэ, УЗИ аппараата баара буоллар, өссө ордук буолуох этэ.

Бу урут ыйыллыбыт сирдэргэ эрэ буолбакка, саҥа сирдэргэ эмиэ туруохтарын сөп эбит. Онон маннык массыыналары көрдөххүтүнэ, тиийэн уочараттааҥ.

Балыыһа пууннара маннык сирдэринэн көрөллөр:

— 1-кы нүөмэрдээх поликлиника – Доҕордоһуу болуоссатыгар,

— Дьокуускайдааҕы 2-с нүөмэрдээх балыыһа – “Оригинал” атыы киинигэр (Можайскай уул. 27),

 — Дьокуускайдааҕы 3-с нүөмэрдээх балыыһа – 45-с нүөмэрдээх “Земляничка” оҕо саадыгар (Автодорожнай уул. 40/4),

— Дьокуускай куораттааҕы мэдиссиинэ киинэ – “Хоттей” атыы комплексыгар (Федор Попов уул. 8/1),

— Доруобуйа харыстабылын уонна медицинскэй сэрэтии өрөспүүбүлүкэтээҕи киинэ – “Елочка” атыы киинигэр (Кеша Алексеев уул. 7).