Үлэ киһини киэргэтэр. Үлэ — дьол

Киин куоракка Пиэрибэй Маайынан тэрилтэлэр кэлэктииптэрэ муус устар 30 күнүгэр субуотунньуктары тэрийэн ыыттылар.

Ол курдук, А.Г. уонна Н.К. Чиряевтар ааттарынан Дьокуускайдааҕы национальнай гимназия кэлэктиибэ тахсан муус устар бүтэһик күнүгэр субуотунньуктаата.

Гимназия дириэктэрэ Валентина Пермякова: «Үлэ киһини киэргэтэр. Үлэ — дьол. Үлэһит киһи тирэхтээх, уйгу олохтоох. Үлэ, эйэ, маай бырааһынньыгынан тапталлаах куораппыт дьаһалтатын ыҥырыытын өйөөн, гимназиябыт бары кылаастара, кэлэктииппит субуотунньуктаатыбыт», — диэн санаатын үллэстэр.

Санаттахха, Дьокуускайга муус устар 25 күнүттэн бүтүн куораттааҕы субуотунньуктар ыытыллаллар. Куораты ыраастыыр, тупсаҕай көрүҥнүүр туһуттан, элбэх киһи субуотунньукка кыттыһар.

Дьокуускай куорат дьаһалтата элбэх кыбартыыралаах дьиэлэр олохтоохторун, тэрилтэлэр үлэһиттэрин субуотунньукка тахсан, дьиэ тулатын ыраастыырга, күргүөмнээхтик үлэлииргэ ыҥырар. Оҕолору да кыттыһыннарыахха сөп. Киһи бэйэтэ хомуйар, ыраастыыр буоллаҕына, хаһан да ыспат-тохпот, атыттар да тардыналлар. Оҕолор көрө сылдьан, улахан дьонтон үөрэнэллэр.