Үлэ киһитэ: 50 бастыҥ үлэһит бириэмийэни ылыаҕа

Кулун тутар 1 күнүттэн Ил Дархан “Үлэ киһитэ” бириэмийэтигэр министиэристибэлэртэн уонна биэдэмистибэлэртэн сайаапканы ылыы түмүктэнэр.

Ол курдук бириэмийэҕэ ханнык баҕарар тэрилтэ кэлэктиибэ бэйэтин үлэһитин туруоруон сөп. Дьоҕус уонна орто урбаан тэрилтэлэриттэн сайаапкалары СӨ Урбааҥҥа, атыыга-эргиэҥҥэ уонна туризмҥа министиэристибэтэ ылар.

Бириэмийэҕэ Саха сиригэр олорор, үлэлиир үлэһиттэр түһэриллэллэр, ыстааһыгар, сааһыгар хааччах суох. Бааһынай (фермерскэй) уонна табаны иитэр хаһаайыстыбалар салайааччыларыттан уонна солбуйааччыларыттан ураты атын ханнык да көрүҥнээх тэрилтэ салайааччыларыттан, солбуйааччыларыттан сайаапканы ылбаттар.

Бириэмийэҕэ түһээччилэри талыы үс түһүмэҕинэн ыытыллар:

1. Үлэ кэлэктиибэ үлэһитин талан, кулун тутар 1 күнүгэр диэри туһааннаах министиэристибэтигэр сайаапка ыытар.
2. Иккис түһүмэххэ министиэристибэлэр уонна биэдэмистибэлэр киирбит сайаапкалары көрөн баран, кулун тутар 20 күнүгэр диэри бастыҥ үлэһиттэри талан, СӨ Үлэ министиэристибэтигэр ыыталлар.
3. Үһүс түһүмэххэ СӨ Бырабыыталыстыбатын иһинэн үлэлиир хамыыһыйа талыллыбыт сайаапкалартан “Үлэ киһитэ” бириэмийэ кыайыылаахтарын быһаарар.

Бириэмийэлэри ыам ыйын 1 күнүгэр – Саас уонна Үлэ бырааһынньыгар туттарыахтара, диэн иһитиннэрэр Ил Дархан, бырабыыталыстыба пресс-сулууспата.

Сиһилии бу сигэнэн киирэн билсиэххитин сөп: https://mintrud.sakha.gov.ru/news/front/view/tag/informacziya+dlya+grazhdan/id/3480478

Ыйыталаһар төлөпүөннэргит: 8(4112)-508-069, 8(4112)-508-076