Чулуу ыанньыксыт, «Аҕа дойду иннигэр үтүөлэрин иһин» 4-с истиэпэннээх уордьан кавалера, САССР тыатын хаһаайыстыбатын Судаарыстыбаннай бириэмийэтин лауреата, Саха Өрөспүүбүлүкэтин тыатын хаһаайыстыбатын үтүөлээх үлэһитэ, Саха сирин бочуоттаах олохтооҕо, Амма улууһун уонна Бөтүҥ нэһилиэгин бочуоттаах олохтооҕо, Дьоруой Ийэ, тыа сирин Далбар Хотуна, Саха сирин киэн туттуута, тарбахха баттанар, ытыктанар киһитэ Аграфена Сутакова 86 сааһын бэлиэтиир диэн Тыа хаһаайыстыбатын министиэристибэтэ иһитиннэрэр.
Хаартыска: «Амма олоҕо» хаһыат «Ытык-мааны Аграфена Егоровнаны Саха Өрөспүүбүлүкэтин тыатын хаһаайыстыбатын министиэристибэтин кэллэктиибин аатыттан күн сирин көрбүт кэрэ-бэлиэ күнүнэн итиитик-истиҥник эҕэрдэлиибит!
Биһиги өрөспүүбүлүкэбит тыатын хаһаайыстыбатыгар Эн курдук эҥкилэ суох бэриниилээх, үлэттэн толлон турбат дьон баар буоланнар үлэ өрө тахсар, сайдар, нэһилиэккэ олох тупсар, киэркэйэр. Күүстээх санааҕынан, дьону үлэҕэ көҕүлүүр аптарытыаккынан тыа хаһаайыстыбатын биир тутаах хаһаайыстыбата – «Бөтүҥ» кээпэрэтиип – сайдыытыгар улахан төһүү күүс буолаҕын.
Томороон тымныылаах, өҥүрүк куйаастаах төрөөбүт дойдубутугар Саханы саха дэтэн кэлбит хороҕор муостааҕы 70 сыл устата утумнаахтык сырыырҕаппыт, үүт үрүйэни үрүлүтэ сүүрдүбүт, тыа хаһаайыстыбатын араас хабааннаах үлүскэннээх үлэтэ саҥа таһымҥа тахсарыгар үгүс сыратын-сылбатын уурбут чулуу ыанньыксыкка күргүөмнээх үлэҕэр сүгүрүйэн туран, махталбытын биллэрэбит.
Ытыктабыллаах Аграфена Егоровна, Эйиэхэ инникитин эстибэт эрчими, уостубат уоҕу, туйгунтан туйгун туругу баҕарабыт. Ис эйгэҥ тэтимэ уу-нуурал уоскуйуутун билиэхтин, ис кэрэҥ суһума аламаас таас хас биирдии аалыыта мичилийэ оонньуурун кэриэтэ чаҕылыччы сыдьаайыахтын! Сахабыт сирин тыатын хаһаайыстыбата, тыа сирэ чэчирии сайдарыгар, дьон-сэргэ олоҕо тупса, уйгута улаата турарыгар күүстээх, таһаарыылаах үлэни!
Айыыһытыҥ арчытынан, Иэйиэхситиҥ иэйиитинэн умсулҕаннаах үлэ күргүөмнээх үөһүгэр, аймахтарыҥ, чугас дьонуҥ арчылаах алгыстарыгар угуттанан, ньир-бааччы дьоллоохтук олор диэн алгыспытын тиэрдэбит.