«Үлэ киһитэ» бириэмийэ лауреата 44 сыл тыа хаһаайыстыбатыгар үлэлээбит

Бүгүн, муус устар 28 күнүгэр, Ю.А. Гагарин аатынан Култуура дьиэтигэр “Үлэ киһитэ” бириэмийэ лауреаттарын биллэрдилэр.

50 бастыҥ туруу үлэһит дьоҥҥо Ил Дархан Айсен Николаев наҕараадалары туттарда. Кинилэр кэккэлэригэр педагогтар, социальнай уонна мэдиссиинискэй үлэһиттэр, бэтэринээрдэр, бырамыысыланнас уонна тыа хаһаайыстыбатын үлэһиттэрэ, култуура, успуорт бэрэстэбиитэллэрэ бааллар.

Федор Васильевич Варфоломеев Бүлүү улууһун Чочу нэһилиэгин “Ампаардаах” ХЭУо бэтэринээр-осеменатора:

«Мин Тыа хаһаайыстыбатын тиэхиньикумун бүтэриэхпиттэн, төрөөбүт дойдубуттан харыс да сири халбарыйбакка 44 сыл үлэлээн кэллим. 90-с сылларга ыһыллыы буолбутугар бэтэринээрийэ управлениетыгар үлэлии барбытым. Онтон  2014 сыллаахтан “Ампаардаах” хаһаайыстыбаҕа үлэлиибин. Манна 270 ынах сүөһүнү тутан туруораллар, ол онтон ыанар ынаҕа — 103.

Миигин “Үлэ киһитэ” үрдүк бириэмийэҕэ түһэрбиттэрин истэн олус долгуйбутум. Ийэм ыанньыксыт этэ, кини бу үлэҕэ миигин иитэн-такайан сыһыарбыта, ол кыһамньыта сыаналаммытыттан олус үөрдүм. Ил Дархаммар Айсен Сергеевичка Үлэ, маай бырааһынньыгын иннинэ үлэ дьонун дьиҥнээхтик сыаналаабытын иһин махтанабын!».