“Үлэ киһитэ” бириэмийэ лауреата волонтердарга 50 тыһ. солкуобай туттарда

“Үлэ киһитэ” СӨ Ил Дарханын бириэмийэтин лауреата Денис Петухов «Ленский покров V» диэн волонтердар хамсааһыннарын пуондатыгар 50 000 солкуобай туттарда. Ол туһунан хамсааһын салайааччыта Зоя Ильчук иһитиннэрдэ.

Ленскэйтэн сылдьар Саха сирин быыһыыр сулууспа аэромобильнай көрдүүр- быыһыыр этэрээтин үлэһитэ Денис Петухов быйыл Үлэ сылынан олохтоммут СӨ Ил Дархана Айсен Николаев бириэмийэтин лауреаттарыттан биирдэстэрэ буолар. Санатан эттэххэ, 300 000 солк. бириэмийэни араас салааҕа үлэлиир 50 киһиэхэ үөрүүлээх быһыыга-майгыга муус устар 28 күнүгэр туттарбыттара.

«Ленский покров V» уопсастыбыннай хамсааһын байыаннай дьайыы кыттыылаахтарыгар маскировкалыыр сабыылары оҥорор. Ону таһынан волонтердар саллааттарга таҥас-сап, эмп уонна суунар тэрил бэлэмнээн ыытталлар.