«Үлэ кыбаартала» 203 резидени түмэр

Дьокуускайга «Үлэ кыбаартала» креативнай кластер былаһааккатыгар 203 резидент үлэлиир.

Бу дизайнердар, ИТ-исписэлиистэр, худуоһунньуктар, мусукааннар, киинэни уонна анимацияны, цифровой контены оҥорооччулар уонна да атыттар ‑ кинилэр бары «Уһук Илиҥҥэ тэриллибит» каталокка хомуллубуттар.

Ааспыт сылга «Үлэ кыбаартала» кластерга Владимир Путин сылдьыбыта. Бэрэсидьиэн «Сайберия» мэдиссиинэ снимоктарын анаалыстыыр бырайыагын, «Хорус» авиационнай двигателлэр кэтээн көрүү тиһигин, «Туундара» анимация устуудьуйатын уо.д.а. билсибитэ. Судаарыстыба баһылыга Саха сиригэр инновациялары киллэриини үрдүктүк сыаналаабыта.

«Үлэ кыбаартала» кластер Дьокуускайга Илин сайдыытын министиэристибэтин өйөбүлүнэн тэриллибитэ. Бу Уһук Илиҥҥэ креативнай индустриялары сайыннарыыга бастакы кластер.

Эбийиэк 15 тыһыынча квадратнай миэтэрэ иэннээх. Резиденнэр ИТ, киинэ, анимация, муода, дизайн, мусука, компьютернай графика, ойуулуур- дьүһүннүүр ускуустуба, о.д.а. хайысхаларынан үлэлииллэр. Сиһилии манна аах.