“Үлэ кыбартаалыгар” дьоһун түгэн үүннэ

От ыйын 29 күнүгэр Дьокуускай куорат  култуурунай, духуобунай  олоҕор уонна устуоруйатыгар киллэриллэр  дьоһуннаах  түгэн буолла. Ол курдук,  «Үлэ кыбартаала» креативнай кластерга  Н.Д.Неустроев аатынан СМАРТ-бибилэтиэкэ  кинигэнэн хааччыйар стационарнай пууна өрөмүөн кэнниттэн үөрүүлээх быһыыга-майгыга арылынна.

СМАРТ-бибилэтиэкэ 2023 сыллаахха креативнай кластер сорҕотунан буолбута уонна куорат Бырамыысыланнай уокуругар көхтөөх үлэни тэрийбитэ. Былырыын сэтинньигэ “Үлэ кыбартаала” креативнай кластерга “Арассыыйа Сбербаана” ПАО бырабылыанньатын бэрэссэдээтэлэ Герман Грефт оробуочай сырыытын чэрчитинэн  сылдьыбыта. Герман Оскарович салгыы бииргэ үлэлииргэ уонна “Үлэ кыбартаалын” резиденнэрин бырайыактарын өйүүргэ эрэллээҕин эппитэ. Бу сырыы бибилэтиэкэ бырайыагын олоххо киллэриигэ бигэ тирэҕинэн буолбута.

Үөрүүлээх аһыллыыга “СӨ сайдыытын корпорацията” АУо генеральнай дириэктэрэ Афанасий Саввин, «Арассыыйа Сбербаана”  АУо Саха сиринээҕи отделениетын управляющайын солбуйааччы Владимир Камашев, Куорат думатын  бэрэссэдээтэлин бастакы солбуйааччы Евдокия Евсикова, “Үлэ кыбартаала” ХЭО дириэктэрэ Наталья Нарушевич, “Якутскэнерго” АУо генеральнай  дириэктэрэ Гаврил Алексеев уонна Бибилэтиэкэлэр киин систиэмэлэрин дириэктэрэ Ньургуйаана Решетникова кытыннылар.

Манна өрөмүөн кэнниттэн сынньанарга табыгастаах кириэһилэлэрдээх сынньанар саала, электроннай өҥөлөр  сектордара, араас тэрээһиннэри ыытар саала уонна оҕолорго анал зона бааллар. Ким баҕалаах ааҕааччы билиэтинэн электроннай бибилэтиэкэр өҥөтүнэн туһаныан сөп.

СМАРТ-бибилэтиэкэ дириэктэрэ Ньургуйаана Решетникова иһитиннэрбитинэн, саҥа дьиэҕэ өрөмүөн, миэбэллэри, тиэхиньикэлэри атыылаһыы уо.д.а. “Сбербаан” уонна “Якутскэнерго” биэрбит үбүнэн ылылынна.

“Биһиги «Сбербааҥҥа» уонна «Якутскэнергоҕа” Дьокуускай куоракка култуура, үөрэхтээһин уонна бибилиэтэкэ систиэмэтэ сайдарыгар улахан кылааттарын иһин улахан махталбытын биллэрэбит. Бэлиэтээн эттэххэ, “Сбербаан” 10 мөлүйүөн солкуобайы өрөмүөҥҥэ уонна миэбэллэри атыылаһарга уонна 5 мөлүйүөн курдугу көмпүүтэр тиэхиньикэтинэн хааччыллыыга биэрбитэ. Онтон “Якутскэнерго” көмөтүнэн  кинигэ биэрэр ыстаансыйалары уонна бырагырааманан хааччыллыы тиэхиньикэтин атыыластыбыт”, — диэн Ньургуйаана Петровна махталын биллэрдэ.

Стационарнай пууҥҥа кэлбит хас биирдии ааҕааччы туох эрэ саҥаны билиэҕэ, таһыынчанан ахсааннаах кинигэни, сурунаалы билсэр кыахтаныаҕа.