«Үлэ кыбартаалын» резиденнэрэ сонун сүүрээннэрин билиһиннэрдилэр

Бүгүн Дьокуускайга «Үлэ кыбартаала» креативнай кластер резиденнэрэ РФ Бэрэсидьиэнин көмөлөһөөччүтэ Максим Орешкиҥҥа, Уһук Илин уонна Арктика сайдыытын миниистрэ Алексей Чекунковка бэйэлэрин бастыҥ бырайыактарын билиһиннэрдилэр.

Ыалдьыттары Ил Дархан Айсен Николаев уонна СӨ Инновация, цифровой сайдыы уонна инфокоммуникационнай технология миниистирэ Анатолий Семенов арыаллаатылар.

Анимация устуудьуйата, көмпүүтэр графиката, киинэ устуута, муода, дизайн, муусука, ойуулуур-дьүһүннүүр ускуустуба – Саха сирин ураты толкуйдаах ыччатын ситиһиитин биир сиргэ түмэн билиһиннэрии буолла.

«Туундара» анимационнай устуудьуйа  ыччаттара номнуо аан дойдутааҕы тэрээһиннэргэ кыттан эрэллэрин иһитиннэрдилэр. Оттон Уһук Илин эрэгийиэҥҥэ соҕотох киинэ устар виртуальнай павильон резиденнэрэ саҥа технологиялары баһылаабыттарын көрөн, ыалдьыттар олуһун сөхтүлэр.

Кластер салайааччыта, Саха сирин сайдыытын корпорациятын генеральнай дириэктэрэ Афанасий Саввин бэлиэтээбитинэн, Голливуд маннык технологияны саҥа баһылаан эрэр үһү.

«КАМА ХАНА» диэн дьикти ааттаах устуудьуйа уолаттара документальнай киинэни оҥоруу эйгэтигэр хаардыы хааман киирбиттэрэ харахха быраҕыллар.

Бу ХИФУ-га устудьуоннуулларыгар видеограф быһыытынан сылдьан баран, бары түмсэн, биир суолталаах дьыалаҕа ылсарга санаммыт уолаттарга Арассыыйатааҕы таһымнаах үрдүк сололоох ыалдьыттар болҕомтолорун хатаатылар.

“Кындыкаан” бырайыак бэрэстэбиитэллэрэ аҕыйах ахсаанаах норуоттар интэриэстэрин көмүскүүр, кинилэр кэскиллээх былааннарын олоххо киллэрэр соруктаах үлэлииллэрин сырдаттылар.

РФ Бэрэсидьиэнин көмөлөһөөччүтэ Максим Орешкин, Уһук Илин уонна Арктика сайдыытын миниистрэ Алексей Чекунков “Үлэ кыбартаала” резиденнэрэ өрөспүүбүлүкэ сайдыытыгар киллэрэр сонун сүүрээннэрин үрдүктүк сыаналаатылар.

«Креативнай кластер үлэтин уопутун дойду атын эрэгийиэннэригэр тарҕатыыны далааһыннаахтык ыытыахха наада«, — диэн Максим Орешкин бэлиэтээтэ.

Ааптар хаартыскаҕа түһэриитэ.