Салгыы
Үлэ сылыгар тыа хаһаайыстыбатын кэпэрэтииптэрин  тэрийиэххэ

Үлэ сылыгар тыа хаһаайыстыбатын кэпэрэтииптэрин  тэрийиэххэ

12.01.2023, 11:00
Бөлөххө киир:

Өрөспүүбүлүкэбит урукку Ил Дархана Егор Борисов: “Үлэни — хамнаһы тэрийиигэ өй- санаа уларыйыан наада”, — диэн муниципальнай тэриллиилэр сийиэстэригэр  олус үчүгэйдик этэн турар. Кырдьык, өй- санаа күүһэ олоххо тардыһыыны күүһүрдэр.

Ханнык баҕарар үлэҕэ өйө-санаата кыайбат дьону хамсаппаккын, оннук дьон олох устун устан эрэ иһэллэр. Тыа сиригэр олорор эдэрчи, саас ортолоох дьон ынах, сылгы ииттэн бэйэлэрин хааччынар, ордорун атыылаан, дохуот оҥостор өйгө — санааҕа киирдэхтэринэ, тыа сиригэр үлэлиир, олорор көдьүүстэн атыны аҕалыа суох этэ.

Өрөспүүбүлүкэ Ил Дархана Айсен Сергеевич Николаев дойдуга буола турар уустук кэмҥэ дьон-сэргэ түмсэн, бары уустуктары туоруурга үлэҕэ-хамнаска ылсан үлэлиэ, үптээх-харчылаах буоларга дьулуһуо диэн 2023 сылы Үлэ сылынан биллэрдэ.

Тыа сиригэр ынах сүөһү көҕүрээһинин биир сүрүн биричиинэтэ дьон сааһыран, доруобуйатын туругунан ынах сүөһүтүн кыччатыыта, төрүт даҕаны эһиитэ буолар. Нэһилиэктэргэ тыа хаһаайыстыбатын кэпэрэтииптэрин тэрийэн, кэтэх ыаллар ынах сүөһүлэрин онно ылан көрдөхпүтүнэ эрэ өбүгэбит саҕаттан төрүт дьарыкпытын сүтэриэ суохпутун сөп. Үөһээ Бүлүүгэ Балаҕаннаах нэһилиэгэр “Кардашевскай Петр Владимирович” бааһынай-пиэрмэр хаһаайыстыбата хаһыс да сылын ыаллар ынах сүөһүлэрин ылан, бэйэтин хаһаайыстыбатыгар көрөр. Петр Владимирович эрэ үтүөтүнэн, киниэхэ итэҕэйэн туттарбыт дьон сүөһүлэрин эспэккэ олороллор. Петр Владимировичтыын кэпэрэтииби тэрийии боппуруоһугар кэпсэтэ сылдьыбыппытын сөбүлэһэр, үлэни тэрийиэм этэ диэн эрэллээхтик этэр. Бу маннык эдэр, патриот дьону СӨ Тыатын хаһаайыстыбатын министиэристибэтэ, улуус, нэһилиэк салалталара өйдөөтөхпүтүнэ, өйөөтөхпүтүнэ, кинилэри утумнааччы, батыһааччы элбиэ этэ.

Кэпэрэтиип нөҥүө хотон тутарга СӨ Тыатын хаһаайыстыбатын министиэристибэтин куонкуруһун аастахха 10 мөлүйүөн солкуобай көрүллэр.

Маны таһынан “Кардашевскай П. В.” бааһынай-пиэрмэр хаһаайыстыбата тустаах министиэристибэ “Дьиэ кэргэн пиэрмэрэ” куонкуруһугар киирсиэн сөп, бу сыалга анаан ТХМ 13 мөлүйүөн үбү-харчыны көрөр. Нэһилиэк кэпэрэтиибигэр анаан бааһына сирдэри оҥотторорго, күрүөлээһиҥҥэ, күөх маассаны, элбэх сыллаах оту ыһарга үбүлээһинин быһаарарбыт буоллар, кэпэрэтиип кэскилэ улахан буолуо этэ.

Кэпэрэтииби тэрийдэхпитинэ, нэһилиэк сылгылаах дьоно биэ төбөтүгэр көрүллэр 5 тыһыынча субсидияны ылар кыахтаналлар. Ол эрэн боппуруос биэ төбөтүгэр субсидияны ылыы эрэ буолбатах — дьон сири оҥорууга, күрүөлээһиҥҥэ кыттыһан үлэлээһинэ буолар. Ол иһин нэһилиэккэ баар бааһыналар, сирдэр, мэччирэҥнэр нэһилиэк дьонун-сэргэтин туһугар үлэлиэхтээхтэр. Тыа хаһаайыстыбатын министиэристибэтэ эдэр пиэрмэрдэри тэҥэ, нэһилиэк кэпэрэтииптэрэ тэриллиилэрин күүскэ өйүөхтээх, ол инниттэн нэһилиэктэр туһаныллыбакка сытар бааһыналарын чөлүгэр түһэриигэ, күөх маассаны, элбэх сыллаах оттору ыһыыга, ону таһынан дулҕа, талах былдьаан, оһон эрэр сирдэри ыраастааһынҥа үбү-харчыны көрүөн наада.

Бааһыналар нолуоктара үрдүгүнэн дьон бааһына сири оҥостору ыарырҕаталлар. Сир боппуруоһа Арассыыйа сирин кодексатынан быһаарылларынан, бааһына нолуогун чэпчэтиигэ СӨ Судаарыстыбаннай Мунньаҕа (Ил Түмэн) олохтоох усулуобуйаҕа сөп түбэһиннэрэн оҥорууга үлэлииригэр баҕарабыт.

Түмүкпэр, тыа сиригэр кэпэрэтииптэри тэрийии өбүгэ саҕаттан төрүт дьарыкпытын чөл хаалларыы, нэһилиэнньэни аһынан-үөлүнэн хаччыйыы диэн тоһоҕолоон бэлиэтиибин. Ону сүрүн сыал-сорук оҥостуохха.

Степан Дмитриев,

Үөһээ Бүлүү улууһун Балаҕаннаах нэһилиэгин баһылыга.

Хаартыскаҕа: СИА архыыбыттан

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
19 июня
  • 16°C
  • Ощущается: 15°Влажность: 63% Скорость ветра: 1 м/с

Сообщить об опечатке

Текст, который будет отправлен нашим редакторам: