Үлэ – үөрүү, үлэ – чиэс

Арассыыйа үрдүнэн балаҕан ыйын үһүс өрөбүлүгэр Ойуур үлэһитин күнүн бэлиэтииллэр. Бу бэлиэ күнүнэн сибээстээн Дьокуускай куорат Сынньалаҥ уонна култуура пааркатыгар баар Ойуур үлэһитин искибиэригэр итиэннэ балаҕан ыйын 24 күнүгэр Бырабыыталыстыба дьиэтигэр үөрүүлээх тэрээһиннэр буолан аастылар.

Ойуур хаһаайыстыбата төрүттэммитэ 85 сыла

Быйыл Саха сиригэр ойуур хаһаайыстыбата төрүттэммитэ 85 сылын туолла. Саха Өрөспүүбүлүкэтин Экологияҕа, айылҕаны туһаныыга уонна ойуур хаһаайыстыбатыгар министиэристибэтэ, тус­­таах биэдэмистибэлэр, тэрил­тэлэр уонна устудьуоннар Саха сиригэр ойуур хаһаайыстыбатын төрүттээччи Константин Аникин уонна Сэбиэскэй Сойуус Дьоруойа Николай Степанов өйдөбүнньүктэригэр сибэкки дьөрбөтүн уурдулар.

Бүгүҥҥү күҥҥэ Саха сиринээҕи ойуур хаһаайыс­тыбатын салаатыгар 2,5 тыһыынчаттан тахса киһи оройуоннарга баар судаарыс­тыбаннай ойуур хаһаайыс­тыбатын филиал­ларыгар, Дьокуускайдааҕы авиационнай ойуур харыстабылын баазатыгар уонна «Якутлесресурс» тэрилтэҕэ  үлэлииллэр. Ону таһынан, Рослес­хоз, Рослесинфорг, Рослесо­защита уонна Авиалесоохрана федеральнай тэрилтэлэр филиал­лара бааллар.

Устуоруйаттан

Саха сиринээҕи ойуур хаһаа­йыстыбатын устуоруйата  1939 сыл олунньу 14 күнүттэн Саха АССР Норуодунай комиссардарын сэбиэтин «Ойуур хаһаайыстыбатын уонна олохтоох суолталаах ойуур хаһаайыс­тыбатын тиһигин тэрийии туһунан» уурааҕа ылыллыбытыттан саҕаланар.

Өрөспүүбүлүкэҕэ ойуур хаһаайыстыбатын тиһигин тэрийээччинэн Арассыыйа ойуурун хаһаайыстыбатын үтүөлээх үлэһитэ Константин Аникин буолар.  Итини сэргэ ойуур хаһаайыстыбатын сайдыытыгар бэйэлэрин кылааттарын киллэрбит дьонунан биологическай билим дуоктара Игорь Щербаков, Арассыыйа ойуурун үтүөлээх үлэһиттэрэ Сергей Соколов, Василий Загайнов, Денис Оконешников, Михаил Охлопков, Вячеслав Олесов, Саргылаана Аммосова, Владимир Леонов, Сэбиэскэй Сойуус Дьоруойа Николай Степанов уонна Арассыыйа Дьоруойа Варвара Устинова буолаллар.

Үбүлүөйдээх тэрээһин

Быйылгы тэрээһин, ойуур баһаардарын сезона балаҕан ыйын ортотугар диэри тардыллан, хойутуу бэлиэтэннэ. Бэлиэ күҥҥэ экологияҕа, айылҕаны туһаныыга уонна ойуур хаһаа­йыстыбатыгар миниистири солбуйааччы Андрей Коноплев бэлиэ күн үөрүүлээх тэрээһинигэр тыл этэригэр: «Бүгүн өрөспүүбүлүкэҕэ ойуур хаһаа­йыстыбатын тэрийиини саҕалаабыт, көлүөнэттэн көлүөнэҕэ ааттара ааттанар бэтэрээннэрбитин өйдөөн, ахтан ааһар, үлэбит түмүгүн таһаарар уонна инники былааны торумнуур күммүт үүннэ», – диэн бэлиэтээн ааста.

Тэрээһиҥҥэ өрөспүүбүлүкэ Экологияҕа министиэристибэтин үлэһиттэрэ, ойуур хаһаайыстыбатын бэтэрээннэрэ, ойууру баһаартан сэрэтэр тэрил­тэлэр үлэһиттэрэ, салайааччылар уонна ойуур хаһаайыстыбатын бэрэстэбиитэллэрэ, ону тэҥэ «Якутлесресурс» тэрилтэ уонна «Рослесинфорг» Саха сиринээҕи филиалын кэлэк­тиибэ кытыннылар.

Бу ойуур үлэһитин искибиэрэ 2015 сыл балаҕан ыйын 16 күнүгэр киин куорат Сынньалаҥ уонна култуура пааркатыгар аһыллыбыта. Оччолорго Сэбиэскэй Сойуус Дьоруойа, Бүлүүтээҕи ойуур хаһаайыстыбатын үлэһитэ Николай Степановка өйдөбүнньүк туруоруллубута. Онтон үс сыл буолан баран, 2018 сыл балаҕан ыйын 21 күнүгэр, Саха сирин ойуурун хаһаайыстыбатын төрүттээбит Константин Аникиҥҥа өйдөбүнньүк аһыллыбыта.

Үлэ киһитэ сыаналанар

Ойуур хаһаайыстыбатын үлэһиттэрин күнүгэр уонна өрөспүүбүлүкэ ойуурун хаһаайыстыбатын 85 сылын көрсө анаммыт үөрүүлээх тэрээһиҥҥэ «Якутлесресурс» тэрилтэ үлэһиттэрэ үтүө суобастаах, бэриниилээх үлэлэрин иһин үрдүк наҕараадалары ылары ситистилэр.

Ол курдук, генеральнай дириэктэри бастакы солбуйаач­чы Спартак Иннокентьевич Ива­нов Экология, айылҕа харыс­табылын уонна ойуур хаһаа­йыстыбатын министиэ­ристибэтин «За вклад в развитие заповедного дела» бэлиэ­тинэн, быраап уонна каадырынан хааччыйыы отделын начаалынньыга Дмитрий Леонидович Данилов Ил Түмэн Сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин Бочуотунай грамотатынан наҕараадаланнылар. Кииннэммит бухгалтерия ведущай буҕаалтыра Вероника Фёдоровна Егорова Экологияҕа, айылҕа харыстабылын уонна ойуур хаһаайыс­тыбатын минис­тиэристибэтин “Ойуур хаһаайыстыбатын туйгуна” бэлиэтин ылла. Ойуур хаһаайыстыбатын салалтатын ойуур харыстабылыгар уонна көмүскэлэригэр 1-кы категориялаах инженерэ Юрий Ильич Кусатов Рослесхоз тэрилтэ Бочуотунай грамотатынан бэлиэтэннэ. Мэҥэ Хаҥаластааҕы филиал ойуур харыстабылыгар уонна көмүс­кэлэригэр 2-с категория­лаах инженерэ Петр Михайлович Винокуров Рослесхоз «Ойуур хаһаайыстыбатын бочуот­таах үлэһитэ», ону таһынан, Саха Өрөспүүбүлүкэтин Идэлээх сойуустарын федерациятын «Килбиэннээх үлэ иһин» бэлиэлэринэн наҕараадаланна. Үөһээ Бүлүүтээҕи филиал дириэктэрэ Алексей Владимирович Захаров РФ Федеральнай Мунньаҕын Федерациятын Сэбиэтин сенаторыттан Махтал суругунан бэлиэтэннэ.