Үлэҕэ киирээри сымыйа ыспыраапканы туттарбыт уонна дьыалаҕа тардыллыбыт

Алдан оройуоннааҕы ИДьМ дознанияҕа отдела үлэҕэ киирэргэ сымыйа докумуону туттарыы иһин холуобунай дьыаланы тэрийэн, суут көрүүтүгэр ыытта.

Саха сиринээҕи ИДьМ пресс-сулууспата суруйарынан, 54 саастаах Краснодарскай кыраай олохтооҕо Алдан оройуонугар вакансия туһунан биллэриини көрбүт уонна вахтовай ньыманан кладовщик буоларга быһаарыммыт. Ол эрээри, үлэ миэстэтигэр наадалаах мэдиссиинэ чинчийиитин ааһыан оннугар, 8000 солк. суумаҕа сымыйа мэдиссиинэ ыспараапкатын атыыласпыт уонна кэлин тэрилтэ каадыр отделыгар туттарбыт.

Ыспыраапка сымыйа буоларын туһунан дьахтар кимиэхэ да эппэтэх. Кини сөптөөх түмүк ыларыгар балыыһаҕа бэрэбиэркэ ыытыллыахтааҕын чахчы билэ сылдьан, бириэмэтинэн тиийбэтинэн атыылаһан ыларга санаммыт.

Сотору буолаат, дьахтары куттал суох буолуу отдел сулууспатын үлэһиттэрэ ыҥыраннар, сымыйа докумуону туттарбытын эппиттэр уонна докумуону былдьаабыттар. Кэлин дьахтар Алдан оройуонун балыыһатыгар мэдиссиинэ чинчийиитин толору ааспыт. Ол гынан баран, сымыйа докумуону туттарыы, туһаныы чахчынан холуобунай дьыала тэриллибит. Бу туһунан Алдан оройуонун ИДьМ пресс-сулууспата иһитиннэрдэ.