Үлэҕэ табахтыыр дьоҥҥо ыстараабы 10 төгүл үрдэтиэхтэрин сөп

«Доруобай Аҕа дойду» уопсастыбаннай хамсааһын бэрэссэдээтэлэ Екатерина Лещинская үлэҕэ табах тардыы иһин административнай накаастабылы уон төгүл улаатыннарарга этии киллэрдэ. Кини бырабыыталыстыба бэрэссэдээтэлэ Михаил Мишустиҥҥа сөптөөх ыҥырыыны ыыппытын туһунан «РИА Новости»  иһитиннэрэр.

Актыбыыстар офистарга, оҥорон таһаарыы эбийиэктэригэр, көрүдүөрдэргэ, санитарнай уонна сулууспалыыр сирдэргэ табахтааһын  элбэҕин тоһоҕолоон бэлиэтииллэр. Кинилэр этэллэринэн, бу сахсааны, иирсээни үөскэтэр, санитария уонна гигиена өттүнэн үлэ усулуобуйатын мөлтөтөр, үлэ дьиссипилиинэтин кэһэр, күүстээх сыт табахтаабат дьоҥҥо мэһэйдиир.

Үлэ миэстэтигэр табахтааһын иһин билиҥҥи 500–1500 солкуобай ыстараап табахсыттарга мэһэй буолбатах диэн ыҥырыыга этиллэр.

Көҥүлэ суох сирдэргэ табахтааһын иһин ыстарааптары биирдиилээн дьоҥҥо уон төгүл, 5000–15000 солкуобайга диэри үрдэтиини көрөргө этиллэр.

Ити сокуон быһыытынан, элбэх кыбартыыралаах дьиэлэр уопсай балконнарыгар табахтаабыт дьон 500-тэн 1500 солкуобайга диэри ыстарааптаналларын Тутууга уонна дьиэ-уот, коммунальнай хаһаайыстыба кэмитиэтин бэрэссэдээтэлин солбуйааччы Сергей Колунов  аҕынна. Бобуу лифтэргэ, кирилиэстэргэ, киирэр ааннарга уонна киирэр аан уопсай балконнарыгар эмиэ сыһыаннаах.

Кыбартыыраҕа табахтааһын эмиэ ыстараапка тиэрдиэн сөп, өскөтүн табах буруотун сыта ыаллыы кыбартыыраҕа киирдэҕинэ. Бу кыбартыыралар олохтоохторо табахтыыр ыалларын  салайар хампаанньаҕа, «Роспотребнадзорга», эбэтэр полицияҕа үҥсэр бырааптаахтар.

«Онтон ол көмөлөспөтөҕүнэ, суукка тиийэн, санитарнай быраабыланы кэһии иһин толуйуу ирдэһиэхтэрин сөп. Ону таһынан, маннык табахсыт эмиэ административнай быраабы кэһии кодексын 6.3 ыстатыйатынан 500 солкуобайга диэри ыстарааптаныаҕа уонна сэрэтиини эмиэ ылыаҕа. Бу кальяннарга эмиэ сыһыаннаах», — диэн дьокутаат бэлиэтээтэ.

Маны тэҥэ, Госдуума спортивнай кэмитиэтин бэрэссэдээтэлин  солбуйааччы Амир Хамитов уулуссаҕа хаама сылдьан табахтыыры боборго этии киллэрбитэ. Кини маннык бобуу куораттары ыраастыырга уонна олорорго табыгастаах оҥорорго көмөлөһүөҕүн, атын өттүнэн, эдэр дьон ортотугар табах тарҕаныытын аҕыйатыан сөбүн бэлиэтээтэ. Ол курдук, хаама сылдьан табахтааһын табах тыыннаах эрэкэлээмэтин курдук буолар.

«Табах буруотун дьайыытыттан гражданнар доруобуйаларын харыстааһын туһунан» сокуоҥҥа сөп түбэһэр уларытыылары киллэрэллэр.