Үлэтэ суох 50 саастаах эр киһи биэнсийэлээх дьахтар харчытын уорбут

Мииринэй улууһугар полицейскайдар биэнсийэлээх дьахтартан баан каартатыттан харчы уоруутун дьыалатын арыйдылар.

Харчыны уорбут уорбаланааччынан дьахтар билэр киһитэ буолара билиннэ. Бу туһунан Мииринэйдээҕи ИДьМ пресс-сулууспата иһитиннэрэр. ИДьМ сулууспатын холуобунай ирдэбилин үлэһиттэрэ Мииринэй оройуонугар суһал-ирдиир дьаһалларынан, баан каартатыттан харчыны уорууга 50 саастаах үлэтэ суох Мииринэй олохтооҕо кыттыгастааҕын  быһаардылар.

Силиэстийэ быһаарыытынан уорбаланааччы эр киһи аҕам саастаах дьахтарга өрүү сылдьар, хаһаайыстыбаҕа көмөлөһөр, бородуукта атыылаһан аҕалар эбит. Биир күн бородуукта атыылаһан баран, уорбаланааччы баан каартатын пин-кодун билэр буолан, таарыйа 20 тыһыынча солкуобайы устан ылбыт. Дьахтар харчы сүппүтүн нөҥүө күнүгэр биирдэ билбит. Холуобунай дьыала тэрилиннэ, уорбаланааччы 6 сылга диэри болдьоххо көҥүлэ быһыллыан сөп.