Үмит Шаһин: “Быыбарга уруккутааҕар элбэх киһи кэллэ”

Бүгүн Турция Өрөспүүбүлүкэтигэр бэрэсидьиэн уонна парламент быыбардара буола тураллар. Турция филологиятын наукатын дуоктара Үмит Шаһин: “Урукку өттүгэр бэрэсидьиэн хайалара буолара син сабаҕаланар буоллаҕына, билигин түмүгү таайар күчүмэҕэй”, — диэн санаатын үллэстэр “Саха сирэ” хаһыат сайтыгар.

“Мин төрөөбүт куораппар Муглаҕа куоластаатым. Урукку быыбардары ылан тэҥнээн көрдөххө, куоластааччы ахсаана быйыл өссө элбээбит курдук. Холобур, бэрэсидьиэн ааспыт быыбарыгар кыттыбыт дьон хасаана 87 бырыһыан этэ”, — диэн этэр кини.

Үмит Шаһин этэринэн, ити Турция Өрөспүүбүлүкэтэ сүүс сыллаах үбүлүөйүн уонна аан дойдуга буола турар балаһыанньаны кытары ыкса сибээстээх.

— Бүгүн эбиэккэ диэри үгүс киһи быыбардаата дииллэр. Эбиэттэн киэһэ өссө элбиирэ буолуо. Быйыл Турция Өрөспүүбүлүкэтэ төрүттэммитэ сүүс сылын бэлиэтиибит. Ону таһынан аан дойдуга буола турар балаһыанньа биһиэхэ эмиэ сабыдыаллыыр, — диэн бэлиэтиир.

Бэрэсидьиэн быыбарыгар үс кандидат киирсэр. Сүрүн утарылаһааччыларынан билигин бэрэсидьиэннии олорор Реджеп Тайип Эрдоган уонна Кемаль Кылычдароглу икки ардыгар буолуо дииллэр.

— Урукку өттүгэр бэрэсидьиэн хайалара буолара син сабаҕаланар буоллаҕына, билигин түмүгү таайар күчүмэҕэй. Тус бэйэм, Турция олохтооҕо быһыытынан, быыбар эйэлээхтик ааһыан, дойду салалтатыгар хайалара талылларыттан тутулуга суох, салгыы сайдыы туһугар үлэлиэҕэ диэн кэтэһэбин, — диэн этэр Үмит Шаһин.